مدونتي طاال عمرك $$ للهذره والحش

**" جآلكسي "** · #1 11-23-2011, 10:53 PM

السلام عليكم ورحمة الله وبركاتهـ

كيف الحال ؟؟ انشاء الله كله تماام ..؟؟
اخيرا سويت مدونه ما بغيت لي كم يوم وانا اقول بسوي مدونه بسوي مدونه بس كنت متعجزه
المهم بعرفكم عن نفسي :::

اسمي : جوري

من السعوديه الرياض بالتحديد

عمري 14 سنه وانشاء الله داخلين عالخمس طعشات >> لي اكثر من خمس شهور وانا اقول هالجمله هع

انا بثالث متوسط وأعد الايام عد لين ما اصير بأول ثنوي لأن احنا بمدرسه مجمع ابتدائي متوسط ثانوي
ومديرتنا الجنيه تكككره المتوسط خاصتا ثالث وثاني تقول فترة الهبال والله ما مهبول غيرها
وقاعده لنا نشبه هم يروحون رحله والمتوسط لا هم يطلبون من مطعم والمتوسط لا هم مدري وش فيهم والمتوسط لاااااا وحتى الاببلات ماهم احسن منها

طيب بقولكم اشياء عني

احب شي اسمه لعب اعشق الالعاب وداايم لازقه بالمنتدى الترفيهي عصبيه شوي لكن بسرعه اطفي
ما اجي بالغصب اكره ما علي ان احد يغصبني على شي يعني انا ما عندي عقل اتصرف فييه ..؟!
واحب السن كولا كثير الحجم الكبير طبعا الصغير ما يسوي شي والحمضيات بعد واحب البطاطس بكل وضعياتها مسلوقه مهروسه مقليه كرسبي مشويه بالايدام المهم بطاااطاا
احبب الهذره كثير واكره لابتوبي كثيير واحب ايبادي كثيير
واحب المهاوشات والمطاقات وبكل هواش تلقوني فازعه هع

طيب باخذ بريك وشوي نكمل هذره اووك ؟؟
بررب

التوقيع :

مضطرة اترككم والله
سامحوني تكفوون
ولا احد يشيل بخاطرة علي
احببكم كلللكم وربي

**" جآلكسي "** · 11-23-2011, 11:14 PM

بااك
خلوني احش شويتين ما تحلى السوالف بدونه استغفر الله ياربي لا تأخذني بس شسوي الحش بكل خليه بجسمي
المهم
انا يا طويلين العمر شلتي من سبع بنات وانا الراس المدبر اللي هو راس البلا وفيه وحده بفصلنا عقلها قد الفصفص هاذا ان وجد
وهي تكرهنا حييل مدري ليش ودايم تسبنا وتحش فينا وتحاول تفرق بينا بس ما عليكم انا عارفه لها داايم اتهاوش معها

واتذكر مره تهاوشنا بقووه وبضراوه وقمنا ندف اول شي هي تقولي يالغبيه يالمدري وش مسويه حالك شاطره بحصة الانقلش
وانا ارد والله ما غيرك غبيه شوفي نفسك بعدين تكلمي كأنك دقاقه مضيعه بيتها وبعدين وش علي شاطره مو مثلك ما افلح غير بالاكل يالدووبا .... وزدنا مناقر وجت دفتني بشويش قلت والله ما اسكت ودفيتها بقووه دخلتها الحمام - وانتم بالكرامه -
وسحبت المفتاح وقفلت الباب وكنت بمشي عنها بس طلعت بوجههي العفريته ابلتنا وقالت بصوتها الاجش ويين رايحه يا جوري قلت منب رايحه وكنت خاايفه لانها ضخخمه مرره لو تدبجني ارووح فيها وقالت وش قاعده تسوين ؟؟ قلت الباب قفل على ( اللي ما تتسمى ) وانا اساعدها بس ماني قادره اطلعها << يسعد البراءه قالت طيب بنادي الفراشات يطلعونها روحي فصلك ورحت وشوي جت ذيك الخبله الفصل وتشمق بوجههي وتقز فيني مدري شلون وبعد الحصه رحت لها وقلت هييه انتي علمتي علي ؟؟ قالت لاا قلت لوا قالت يلوي حنونكك وقمنا مهاوشه من جديد ومن يومها واحنا ما نطيق بعض ..وتوته توته خلصت الحدوته

**" جآلكسي "** · 11-23-2011, 11:23 PM

يا ناس فيه وحده بالمسن عندي قااهرتني هي وتوبيكاتها الغبيه مره كاتبه انا اكسر خشم اللي ما ينكسر بالله هذي جمله الناس تقول كلام زين وهي بس شاطره تكسر خشووم ولما تشوفني داخله تسجل دخول وتسجل خروج ودخول وخروج
تبغاني انتبه انها دخلت واكلمها ويوم اسولف معها ما نكمل كلمتين غير وهي تقول معليش جوووريي على قولتها بطني تعوورني بطلع انام والله لو اني تييس اعرف انها تهايط علي وانا مسويه لها بلوك من زماااااان

**" جآلكسي "** · 11-23-2011, 11:26 PM

ذي الصوره كلما شفتها افطس ضحك مدري ليش هههههههههه
يارب يكفخها ههههه
احس اللي سواها انسان فااضي بمعنى الكلمه

**" جآلكسي "** · 11-23-2011, 11:49 PM

بحط لكم صور تعجبني جبتها من النت

حلوه هالصوره تشهي ^__^

مدري ليش احب هالصوره ..

هذي الصوره جميييييييييله مرره نعومه وكيوت بحطها بالمسن ^^

احح جعت ...

هالولد تووووووحفه ..

ابيي ذي الفوشيه اللي بالنص ..

هذا كيووووووووووت مرره يزننوون يا دلبهم اهم شي الشوز الفوشي

هههههههه حلوه هالصوره يا حليلهم والله ذكروني بناس اعرفهم هع

وبثث اسرقوا لو تبون عادي << من زينها يعني

**" جآلكسي "** · 11-24-2011, 10:34 AM

صباح الخير يا دوودي ( دلع مدونتي ) صباح النور والسرور والحبور والورد والزهور والبخور والعطور
صباااحكم سكر

بقولكم شي لاحظته بالايام الاخيره ان الناس بدت تموت >> الله يسد نفسك عالصبح
لا والله من جد صديقاتي اكثرهم عندهم ناس ماتوا
طيب بقولكم صديقاتي كل وحده من مات عندها بس ما بقول اسماء صديقاتي بقول صفه فيهم
المهم
نعوومه قبل يومين اظن جت للمدرسه متضايقه ويوم سألناها وش فيك قامت تصيح وتقول عمتي ماتت
وعمتها كانت مريضه بس نسيت وش مرضها الله يرحمها

وصدقتي ام كشه تقول ان جدتها ماتت والمشكله ولااا همها تضحك وتنكتت حسيت ودي امعط كشتها

وصديقتي كريهه ماتت خالتها قبل شهر تقريبا وسببت لنا ازمه بالمسن خرعتنا نحسب وحده من فصلنا ماتت المهم الله يرحم خالتها هي بعد كانت مريضه مدري بايش

وصديقتي نذله امس تكلمني بالمسن وتقول ان وحده تقرب لهم ماتت وهي رايحه للجامعه مع اخوها واخوها بالمستشفى اما هي ماتت الله يرحمها

وصديقتي مدمنه بيبي كاتبه بالمسن الله يرحمه ويغفر له وسألتها من هو اللي مات لسى ما ردت علي

وصديقتي على نياتها اظن يوم الثلاثاء غابت ويوم جت الاربعاء قلنا لها ليش غبتي قالت عمي مات عاد يا حياتي عنده اولاد وبنات كثير ولسى صغار الله يحفظهم ويعين امهم ويرحم ابوهم

وبس واذا مات احد ثاني لا سمح الله بقولكم ادري نكدت عليكم بس والله شكل القيامه قربت بدين واصير مطوعه

الله يرحم كل موتى المسلمين ويغفر لهم

**" جآلكسي "** · 11-24-2011, 10:41 AM

عزيزي القارئ اصبر شوي بروح افطر وارجع اهذر على راسك اووك ..؟؟
برررب

**" جآلكسي "** · 11-24-2011, 11:45 AM

بااك
الحمدلله كلييت >> على قولت بنت خالتي

قسسم مقهووره خسااره كتبت لكم سالفه خطيره صارت معاي بالمدرسه بس يوم جيت ابي اضيف الرد ضغت على المدونه اللي تحتي بدال ما اضغط على اضف رد سريع قهههر عاد متعجزه اكتبه مره ثانيه مرره طوييييييل اللي يبيني اكتبه يقولي

**" جآلكسي "** · 11-24-2011, 11:48 AM

الناس الحلوين اللي حطوا لي شكر
انا اللي اشكركم والله حسستوني ان احد قاعد يقرا ماني قاعده اكتب لنفسي
وشجعتوني اكمل مدونتي كنت ناويه احذفها واسوي مدونه ثانيه ازين من ذي

**" جآلكسي "** · 11-24-2011, 12:36 PM

اففف ليش في شي اسمه مذاكره ؟ ليش فيه دراسه ؟ ليش فيه اختبارات ؟
اووك المدرسه مهمه ما قلنا شي بس ليش ما تكون الدراسه بالمدرسه بسس
ليش سموها مدرسه دامنا راح نرجع لبيوتنا وندرس ونذاكر ونحل واجبات

ما يصير كذا والله دراسه بالمدرسه ودراسه بالبيت ..؟!!! ليش بتطلعونا عباقره وعلماء مثلا ..؟!
قصيده من تخريفي :

سحقا للدراسه تبا للواجبات وقطيعه تقطع ابلاتنا الغبيات
ندرس ونقرا ونكتب ونسوي ونجيب ونحط لين ما تجينا امراض وجلطات
يعني بيطلعونا دكاتره وعباقره وعالمات ..؟!
حياتنا صارت درس درس درس مااااات
وبالمدرسه نلقى مجانين ومختلين ومختلف الحالات
ليش ما يخلونا نستانس اكل ولعب ونت وطلعات ؟؟
تبا تبا تبا للواجبات وسحقا للاختبارات

خلاص روقت كنت معصبه الحين لا
ترا انا اللي خرفت شبه القصيده اللي قبل شوي هع

-:مواضيع أخرى تفيدك:-
الموضوع	كاتب الموضوع	المنتدى
يوم من عمرك..ما كان يومك...!!!!!	الـرومـانـسـيـه	فرفشة حواء
صور تخليك تشك في عمرك..	music lover	صور 2013 2014
عشر نجمات تضيء لك عمرك ....	آفـــــــآاق	المنتدى العام
عمرك سمعت عن شاطى الزجاج	بون كلاي احبك	صور 2013 2014
ماذا تفعل لو بقي من عمرك يوم واحد !!!!	الوردة النقية	المنتدى الإسلامي العام