!i...; فيض الخآآطر ;...i! ~~ مدونتي ^^" ~~

[بون كلاي احبك]

 

سألت امي عن ولادتي وسنواتي الاولى

وكان جوابها

ولدت في باديه << معقوله ... قسم ههه

اسمها المضيق تبعد عن المدينه 140 كم سمعت انها الان صارت قريه

بالخيمه يوم 27 رمضان من عام 1411هـ

الساعه 11 الصباح ...

خرجت للنور بالخميه مارحت لمستشفى

هذي ولادتي

عشت عند امي وجدتي

ابوي كان ساكن بالمدينه عند خالتي << ( زوجة ابوي الله يطول بعمرها )

امم ليه امي ما سكنت بالمدينه وقتها ماادري ليه

مااشوف ابوي الا يوم الاربعاء يجي ويرجع للمدينه بعد صلاة الجمعه

كان عندي اخوي اكبر مني بسنه واولاد خالي ... عشت هناك

بقولك المنظر وتخيله

خيمة جدتي جنبها خيمة المطبخ وجنب المطبخ خيمة خالتي

وقدمنا هنااااك خيمة خالي

والجهة الثاني فيه شبك غنم ودجاج

كنت اصحى قبل الشروق بشوي واطلع العب مع الدجاج

بعدين اروح مع خالتي بالغنم نتمشى

مافيه لا تليفزون ولا لاب توب ولا سوبر ماركت

نرجع الساعه 10 تقريبا يكون اخوي صحى من النوم

ونلعب مع اولاد خالي او نطلع للجبال

الى المغرب نجلس وبعدين نتعشى ونووم

جلست كذا 6 سنوات يعني الطفوله كلها

نقلنا للمدينه عشان اخوي بيدخل للمدرسه

اول ما جيت للمدينه كنت مبهور واحب اخرج للشارع واستكشف

بس امي ما كانت تسمح لي اخرج لاني متهور ممكن اضيع

وحبيت القراءة كثير كنت اشتري قصص اقرا ولون مااحب التلوين بس

اقرا الحكايه واتركها واشتري ثانيه

وفي صف خامس ابتدائي صرت اشتري مجلة باسم

كان سعرها 3 ريال اجمعهم من مصروفي

كانت امي تمنعني اقراها تقول

كلمتها المشهورة ^^ ... ايش تبغى فيها كلها صور كلاب

بس انا صراحه كانت المجله مثل استاذي كنت اتعلم منها

اشياء كثير استمريت عليها الى 2 متوسط

بعدين بدت اقرا كتب القصص من دار الحضارة للنشر

كانت اصدراتها تعجبني كثير حتى اخواني صارو يقروها مثلي

وكنت افرح كثير لما اشوف واحد منهم يقرا

لانها كانت تتكلم عن العقوق .. التدخين .. المعاكسات ... الظلم

واشياء كثيرة حلوه

جلست ع هذي المكتبه الى 2 ثانوي دخلت مدرسه اهليه

و اول يوم بالفسحه رحت للمكتبه اللي في المدرسه

كان الاستاذ الله يذكره بالخير سوري

قلت ممكن اقرا قال اكيد تفضل بس رجعه مكانه بعد ما تخلص

كثير فرحت ونسيت الجوع والفطور

واخذت روايه اسمها السهم الاحمر .. العنوان اعجبني

قرات تقريبا 23 صفحه وانتهت الفسحه

واليوم الثاني كملت الى 50 صفحه .. وبعدين
كلمت الاستاذ قلت ممكن استعير الكتاب

قالي ممكن اخذ الكتاب وسجل البيانات بالكشف وسجل اسمي والتوقيع

ورحت للبيت جلست بعد الغداء كاني مااسك شي ثمين

جدا مبسوط فيه

بديت اقرا الى الساعه 5 العصر

في 3 ايام خلصت منه تقريبا كان 320 صفحه

المهم استمريت كذا اخذ كتاب وارجعه

بس الكتب الموجوده بالثانوي كانت علميه

وماكنت احصل مثلها بالمكتبه اللي بالحي

فا بديت اروح لمكتبه جرير والعبيكان

الين تعلمت النت للمره الاولى فيه صيف 1429هـ

ومنها قل قراتي للكتب النت صار ياخذ من وقتي كثير

والصراحه اشتقت كثير للكتاب

هو اول اصدقائي

كان يعلمني اذا جهلت ويواسيني اذا حزنت ويسليني اذا طفشت

والله ما لقيت اوفى منه ^^

يوو احس اني كثرت كلام

يلاا

تابعوني...

التوقيع :

[IMG]https://www.**********/d2/up13228411531.jpg[/IMG]

شكرا كثير صديقي العزيز ونـ بيسـ ع الهديه الروعه

---

التعديل الأخير تم بواسطة بون كلاي احبك ; 09-23-2011 الساعة 09:28 PM