يا جماعة, مع كل احترامي لكم
انتو بتذهلوني لما تفتحو مواضيع عجيبة زي دي!
و باقرا جمل الصراحة... مدري من فين بتطلع!
ترى اول شي احب اذكركم بانه الكرتونات اللي تتكلمو عنها
(عدنان و لينا, جزيرة الكنز, سبونج بوب...الخ) كلها كرتونات كنتو تتابعوها
لما كنتو صغار, هل احد فيكم اتاثر بيها و صار منحرف؟!
اذا لا, اجل ليش مسويين عليها فلم هندي انها تؤثر على عقول الاطفال
و الكلام الغريب دا؟!
تاني شي احب انبهكم انه اللي سوو الكرتونات دي هم اجانب سووها
لحاجاتهم الشخصية, و احنا العرب اللي اخدناها منهم... كيف تقولو
انهم سوو الكرتون الفلاني عشان يخربو عقولنا؟! كلام غير منطقي!
والله سواء سبونج بوب او غيره, كلها مجرد كرتونات, الاطفال عندنا يتفرجوها
عشان يستمتعو و ينمو خيالهم و يصير عندهم روح المرح, صح احيانا الطفل
يتاثر بشكل سلبي, بس كل طفل له حالة خاصة لازم يمر بيها عشان يتعلم الصح من الغلط
و هنا يجي دور الاهل, لو اي طفل عمل شي غلط و قال انه اتعلمه من الكرتون الفلاني
مو معناها ان الكرتون دا يخرب عقولهم! لا, معناها ان الطفل وصل للمرحلة
اللي اتكلمت عنها
...
كلامي ماهو مجرد اعتقاد, انا درست طب نفسي فالجامعة
انا ماني متحمل اي مسؤولية, بس اضمنلكم كلامي
انصحكم انكم ما تسلبو طفولة اخوانكم و تحرموهم من الكرتونات دي
لانها حتبقى ذكرى جميلة عندهم
انا و كثير من اللي اعرفهم الين دحين مقهورين من ايام طلعو خبر سخيف
عن بوكيمون و منعوه فكل مكان! لا تخلو اطفالكم يمرو بالحالة دي
لا تستهونو فكلامي, ترى الطفل اذا خسر الكرتون, ماحيبقاله غير الشارع
و لما يكبر و تسووله نفس الفلم الهندي عالاجهزة الباقية, حتصير متعته فالشارع
صح انه فيه فعلا دي الايام فيه بعض الكرتونات اللي لازم تنتبهولها
لانها قذرة شوية, بس سيبو الكرتونات النظيفة فحالها, تراها ما تنشر رسالة
ولا تخرب عقول ولا تسوي اي شي... كله كلام مخرف من ناس
تبغى تدعي انها فاهمة
اتمنى اكون افدتكم, و شكرا على الطرح
سلام