سألونى بتحب مين ؟
قلتهم ست الحسن
واسمها على الجبين
أم البساطه والناس الطيبين
أم السمار والعيون المعسولين
... أم الحضاره والتاريخ طول السنين
أم الأزهر والحسين
أم القلوب العابدين
أم المآذن وصفوف المصلين
أم السيده بنصلى فيها ركعتين
أم الإيمان وقلوب الخاشعين
نصارى كانوا أو مسلمين
والقلب ليها مليان حنين
فيها ظالم ومظلومين
وعلى الظلم موش ساكتين
ولو حتى كنا موش قدرين
والظلم لو طال هيكون يومين
وأبعد وأسافر ألف ميل أو ألفين
هى فيا لو بعدت هروح لمين
وحبها بيجرى فدمى وبين الشرايين

انا عاشق وفي حبها مخلص أمين
وعلى حبها بيتنافس المتنافسين
انا جوه منها زى موجه ما بين شطين
وسحرها زى شبكه الصيدين
او فلوكه جوه ميه عليها معدين
بحب نيلها والخضار على الضفتين
بحب فيها الزحمه ودوشة السوقين
بحب ناسها فى بولاق و المهندسين
بحب فيها النسيم والندا على شجره تين
بحب فيها ولادها المخلصين
عمال كانوا او فلاحين
أبطال او مكسورين
بسطاء او فنانين
مبسوطين أو مكشرين
أصحاب ولا متخاصمين
فى الأول والآخر إسمهم مصريين