&&&&&&&&&&&&&&&&&&&&
عند العيال..
طلال: بعد هنا حاجرينا..
مشاري: انت اصبر شوي وبعدها ما راح يشوفونا..
وليد: اقول وين فيصل..؟
فواز: اكيد الحين مع المدام..
ماجد: وانت ليش ما تروح مع المدام...؟
فواز: واللي يعافيك اسكت..
ماجد: اذا ما تحبها طلقها..
فواز انصدم من فكرة انه يطلقها: اطلقها!!!! ليش اطلقها؟؟؟
ماجد: احسن من انك راميها..
فواز: ومن قال ان انا راميها..
ماجد: اجل اللي انت تسويه شنو؟؟
فواز: اربيها..
ماجد: تربيها..ليش بزر عندك..
فواز: انت وش عليك..اذا تزوجت هذيك الساعه تكلم..
سعود: ما شا الله الشاليه روعه..
نواف: بصراحه شي خطير..
تركي يستهبل حط رجل على رجل: عاد انتوا ما قد شفتوا خير ما تنلامون..
سليمان يكمل معاه: معاك حق يا تركي انا ما ادري وشلون صادقتهم...لالا شكلهم هم ذابين وجيهم علينا..
تركي: ايه اتذكر يوم سعودوه يتلزق فيني واحاول اصرفه بس ما يفهم..
سليمان: يا شينها من ايام لا تذكرني فيها واللي يعافيك..
سعوود: نواف وش رايك نطلع بكرامتنا ازين...
نواف: يلا..
تركي: بسرعه: وين وين راحين...؟
سعود بدون نفس: بنطلع انقرفنا..
تركي: اجلسوا لايفجرون فيكم الشياب..
سليمان: ما خلوا عيالهم يطلعون عشان انتم تسوونها..
سعود: صدق ليش؟؟
سليمان: كذا عباطه..
تركي: لازم ينكدون عليهم مساكين..
نواف: بس بصراحه اهاليهم مره ديمقراطيين..
تركي: في هذي صدقت."وتذكر ابوه وسكت"
سليمان: وش فيك؟؟
تركي معقد حواجبه: لا ابد سلامتك..
سليمان ما حب يصرّ على تركي مع انه عارف السبب..اكيد ابوه...ابوه حمله المسؤليه وهو صغير دايم هو المسؤل عن امه واخته الهنوف.. طول حياته برى ..ما كان ابوه يسأل عنهم ابد بس يرسل لهم فلوس وكأن هذا الشي اللي ممكن يحتاجونه منه..ام تركي عايشه وماهي عايشه..هي متزوجه وكأنها ماهي متزوجه..يعني محسوبه زوجه بالاسم.زوجها ما يتصل عيلها وما يكلمها وما يسأل عن عياله بس لاهي في جمع الفلوس وبس.. حتى انه ما يرجع للرياض الا يومين ثلاثه ويرجع غريب عليهم ما يعرفونه.. ما يدرون كيف يسولفون معاه.حتى سلامهم عليه بارد ما فيه أي احساس..الهنوف قسى قلبها على ابوها ما تحبه وما تحب تسمع سيرته..تحس انه تخلى عنها وعن اخوها توئمها وحبيبها..فا صارت سيرة ابوهم من السير المحرمه انها تنقال..تركي والهنوف كانوا دايما يتمنون يكون عندهم أب يعتمدون عليه..كانت دايم الهنوف تتمنى من ابوها يجيب لها اغراضها ويوديها ويجيبها..يحبها ..يبوسها يلعبها..تحس ان وراها سند وظهر تستند عليه في وقت شدتها..حتى تركي نفس الشي..وده ابوه يصارخ عليه اذا تأخر..يعصب لما يدري انه يكلم بنات ويلعب عليهم..يخاف اذا صار عليه شي..يهتم ويسأل عنه بالمدرسه لما كان صغير..بس كان اللي مسوي كل هذي الشغلات امه لحد ما كبر وصار رجال وبدى يعتمد على نفسه.امه تركت عليه نصف المسؤليه..وهوتحملها وقال انا لها..
نواف: تركي..تروك...تركان....
تركي: هلا..
نواف: وينك وين رحت...
تركي: معاك ..معاك..
نواف: كنا نقول كم تتوقع نسبتك..
تركي: اما انتوا يا الدفره عليكم سوالف ما ادري وش تبي..
سليمان: لالا بجد تروك كم تتوقع..
تركي: يمكن 90%..وانت.
سليمان: 93%..
تركي: ونوافوه الخبل وسعودوه الاهبل كم تتوقعون...
سعود: ما راح ارد عليك لان عقلك صغير..
سليمان: اخلص..
سعود: 92%..
تركي: اجل اكيد نوافوه الخبل 90%..
سليمان: ليش.؟؟
تركي: ما شا الله بالترتيب انا 90 ونواف 91 وسعوده 92 وانت 93..
سليمان:صدق احنا اصدقا حتى في النسب قربين..
تركي يتطنز: لاااااا ما شا الله وش هالتفكير السليم في الجسم السليم..
سليمان: ههههه ما نسيتها من العلوم في الابتدائي..
ضحكوا البقيه: هههه يا الله مغبره من جد..
مشاري يأشر: طالع طالع ابوي وشلون يتكلم وهو متحمس..
طلال: هههه شوف شوف الوالد كيف يعارض.
وليد: اتحداكم تلقون مثل ابوي..دايم يعارض وما قد صار مؤيد..
ابو مشاري: يا اخي لازم يلاقون حل لي أنفلونزا الطيور..
ابو ماجد: وانت صادق ما يصير كذا..
ابو فواز: انتوا سمعتوا باللي ماتوا بالسعوديه..
ابو فيصل: من جد حرام تروح ارواح المسلمين..
ابو مشاري: يعني الناس بتضطر تاكل لحوم ونرجع لوضوع ارتفاع الاسعار لان الاسعار موصله للسقف..كل شي غالي..
ابو فواز: والله اني اعرف ناس ما يقدورن يجيبون اللقمه من اول كيف الحين مساكين..
ابو ماجد: والله ناس كثير ومن الطبقه المتوسطه مو الفقيره صارت فقيره من الغلا هذا..
ابو مشاري: هذا اللي راح يسبب فجوه..وراح يصير طبقتين بالمجتمع الطبقه الراقيه او الغنيه والطبقه الضعيفه او الفقيره..
ابو فيصل: وراح نصير مثل الشعوب النائيه..
محمد: واقول لك كنت راكب الدباب.وتخيل خلاص بنقلب الا امسك الطاره واعدلها بسرعه..هاه وش رايك فيني..
مشعل: رهيب .ذكرتني يوم كنا في العطله الصيفيه اللي راحت..كان نتحدا انا واحد من العيال من المركز الصيفي ومطلعينا نطعس..المهم كنت ماشي ومسرع واطعس الا يجيك الولد من قدامي قلت في نفسي يا ولد وين تروح اذا رحت يمين طلعه عاليه وبنقلب واذا رحت يسار نزله وبيطيح وبتكسر والولد قدماي ..وقلت يا ولد ادعس وادعس وانا وياه خلاص بنتصادم الا هو وخر عن طريقي وانا كملت هههه بس كان موقف رهيب وفي نفس الوقت مغامره..
محمد: ايوه بعد ذاك اليوم.....
لين جالسه معاهم: خلاص انت اسكت خلي مشعل يتكلم.مغامراته احسن من مغامراتك البايخه..
محمد: اعصابك هاه..تراني ما احب البنات وكفايه متحملك..
لين: مشعل شوفه..
مشعل: لا تدخلين فيه.يعني انتي الغلطانه.
لين سكتت..
محمد طالعها بعدين كمل: ايوه وش كنت اقول لا اله الا الله...ايوه ذكرت..
وكمل سواليف ولين موصله معاها ومشعل ومحمد ميتين ضحك عليها وكانوا يبون يطفشونها...
&&&&&&&&&&&&&&&&&&&&&&
رغد: طيب ممكن اكلم البنات بس ما راح اقول لهم انك قلتي لي شي وما راح اجيب طاريك وكأننا بنحل موضوعك وانتي ما تعرفي عن شي وش رايك...
بدور: كيفك سوي اللي تبين بس اهم شي فواز يرجع لي مثل اول ..بس ودي انك تبلغيني بكل شي بتسوينه وما تقولين للبنات شي عني ااوكي..
رغد: اوكي..
بدور ابتسمت: نرجع عند الحريم..
رغد: مشينا..
ودخلوا بأمل متجدد بعكس لما طلعوا كان اليأس مسيطر..طلعت بدور بوجه ورجعت بوجه ثاني مبتسم صافي والامل والحب يتجدد فيه وجلسوا مع البنات..
&&&&&&&&&&&&&&&&&&&&&