السلام عليكم ورحمة الله وبركاته
كيفكم؟؟
موضوع اعجبني وحبيت انكم تشاركوني فيه

هذا اخر مقلب سواه فيني ( موضوع للأمهـــات

عندي ولد عمره 3 سنين ونص

مبدع عليه مقالب وسوالف غريبه واذا غاب 3 دقايق معناها مسوي شي


طبعا الاحرف عنده 70 بالميه ما ينطقهم واذا تكلم شي افهمه وشي ما افهمه



بس افهم كلمة ماما عدل لما ينطقها .. وينطقها بالحالات التاليه فقط ..



1- يخرب او يكسر شي

2- لما يبغا ينام

وله غير كذا يناديني بأسمي يااااااا فـــلانه وبعين قويه



هو حبوب و مره حنون وعسوول ويجنن بس مرات ما نتفق مادري ليش



المهم

مره جيته ولقيته جايب كــــــــــومة رمل ويصب فوقها مويه وكل شوي جايبله كوب مويه ويصب وهذا شغلته لما البيت صار كله مويه ورمل .. ناديته طبعا ما يرد علي ( بودي يرد على لو مره وحده ) جيته قلت له يا ماما وش تسوي .. ليش كذا

قالي وهو مشغول برمله ( عثان يطلع سدله ساي) الترجمه ( عشان يطلع شجره شاهي)

يبغا يطلع شجره بنص البيت
عاد انا فهمته وقلت له ما يصير .. ومن هالسوالف طبعا ما عجبه كلامي راح وقعد عالتلفزيون
ولما شلت الرمل عشان انظف الكارثه الى مسويها لقيت الاخ الكريم حاط بنص الرمل اكياس لبتون

حاط اكياس لبتون بنص الرمل ويصب فوقهم مويه عشان تطلع شجرة شاي

لا تعليق



اما اخر مقلبه فيني

جاني للغرفه وانا جالسه بحال سبيلي اشوف ام بي سي كنت مبسوووطه

شوي وانه حاط شغله لافها بمنشفه على الطاوله قالى ( خلاث الحين الله يحبه )
قلت يا مااما منو وايش الى بأيدك هذا
قالي بكل ثقه يا ماما انا لوثته عثان الله يحبه ) الترجمه ( انا روشته عشان الله يحبه
بالي ان مروش بسه وله سيارته وله اي لعبه وله حتي الشغاله
لما شلت غطا المنشفه وليتني ما شلتها

لقييت جهازي الابتوب مروشه بمويه وشامبو جونسون حق الاطفال

جهازي انا مروشه ..و مادري مروشه على ايش



جد احترت وش اسوي فيه

لما شافني معصبه وقمت اهاوشه قام يسبلي بعويناته ويقول ( خلاث ماما بيعيني وديبي مثله)يسوي حاله حزين طبعا

يقصد ابيعه هو واجيب جهاز لابتوب جديد انا بصراحه فكرت فيها بس الاكيد ان ما راح احد يشتريه

بعدين كسر خاطري قمت حضنته وقلت له لا تعيدها مره ثانيه طبعا بعد ما وعدته اوديه لأبو ريالين

لما راح من عندي وصل للباب التفت لى وقال بكل ثقه ( خلاث ماما ثامحتك

بوقتها فكرت اربطه بالمروحه وشغلها على 8 او 9 واذا فيه فوق 9 يكون افضل

وش اسوي فيه





هذا غير كل شوي يقول لابوه ( يا بابا غيل ماما ) ( غير ماما

توقعت ساعتها يقوله ابوه لا بابا عيب او يقوله ماما مافى مثلها بهالدنيا او يقوله تخسي انت وجهك

لا ما قال كذا .. ابو الشباب سكت وقام يتبسم
ساعتها حسيت اني شغاله وله كفر سياره يبغا التبديل

طبعا زعلت ( على الاب المبتسم ) وظليت لين جاب لى هديه ترضيه .. ونااسه لو كل مره اسويها زعله



اما ولدي .. الى الأن مستمر بسوالفه الغريبه

الله يخليه لى ويهديه

اتمنى اشوف تعليقاتكم

-:مواضيع أخرى تفيدك:-

• ماساجات مقالب
• قصص مقالب العرسان رووووعة
• مقالة رهيبة للشيخ عائض القرني عن المرأة
• الشباب يستدرج القادسية.. والنصر يخشى مقالب الفيصلي
• ي ابنتي مقالة رائعة للشيخ علي الطنطاوي رحمه الله