يقال أن اليابانيين أكثر شعوب العالم المتقدم حرماناً من العطلات ،
هم حارمين انفسهم بانفسهم - ما يبون اجازات
اذ لا يتعدى متوسط اجازاتهم تسعة أيام في العام
بينما الفرنسيون هما أصحاب النصيب الاكبر من العطلات
بمتوسط يبلغ 34.5 يوم سنوياً.
وتمنح الولايات المتحدة العاملين ثاني أقل عدد من العطلات سنويا
بمتوسط 17 يوماً يأخذ معظم العاملين منها 14 يوماً ،
ويمنح النيوزيلنديون 19.5 يوم سنوياً يستهلكون منها نحو 17
بينما يستخدم الاستراليون 16.5 يوم تقريباً من اجمالي العطلات وعددها 20 يوماً.
مساكين يا اليابانيين
صدق أنكم شعب محروم من الراحه
تهجولون في ذا الدنيا لا راحه ولا نوم ولا فلة حجاج
علشان تقدمون اختراعات تفيد الانسانية
ثم تموتون واللي ما اسلم منكم بيخلد في النار
وخلوا الانسانية وسوني ومتسوبيشي وتويوتا تنفعكم
اقول خلوكم مثلنا بس
والله ياالانسانية ما قامت عندنا ولا قعدت
فالين ام الحياة.. اجازات ونوم وتسدح وتبطح ولله الحمد والمنـّه
شوفونا ايام السنه 365 واجازتنا 355 يوم
الموظفين..شهر إجازة نظامية و10 ايام اضطرارية
و3 شهور تروح ما بين اجازاة وفاة والديه وعمانه وعماته وخواله وخالاته
وامهاته من الرضاع وابوانه من الرضاعه واصدقاه من الرضاع
الموظف السعودي:
هو الوحيد في العالم اللي تتوفى له 12 جده و12 جد في السنه..
ومنها شهرين استئذانات من المدير علشان يجدد الرخصه والاستماره
ويضيف ولده في دفتر العائلة ويسجل ولده الثاني في المدرسة
ويطلع ولده الثالث من مرور الناصرية ..
و55 يوم يطلع من الدوام يبلغ الشرطة عن شغالته المنحاشة
و3 شهور اجازات مرضية منها شهر ونص في السنة
اجازات خلع اسنان .. تماسيح مهوب موظفين
وبعدين مدري وش ذا الاسنان اللي يخلعونها وتنبت ..
تصدقون يا جماعه ان بعضهم يكون باقي عليه سنتين ويتقاعد
ويجيب اجازه مرضيه بسبب خلع ضرس عقل
واللي موقع الاجازه طبيب نساء وولاده
أما الطلاب والطالبات :
اجازات الصيف 3 شهور
ومعها مكرمه من اهالي الطلاب نص شهر
واجازة حج 20 يوم
معها مكرمه 10 ايام من اهالي الطلاب والطالبات
و10 ايام اجازاة نص سنه
ومعها 15 يوم مكرمه من اهالي الطلاب والطالبات
واجازة ربيع ومعها 15 يوم مكرمه من اهالي الطلاب والطالبات
واجازات امطار واجازات غبار
وغيابات بسبب الانفلونزات
وغيابات للطلاب بسبب هزايم فرقهم..
واللي مسكوه المرور وخلوه يفك انوار الزينون
وعلم ابوه ولعن جدفه ..وتعبت نفسيته
وغيابات للطالبات بسبب ان بطونهن توجعهن
وغياب لان نفسياتهن تعبانه ..
واسباب تعب نفسيات البنات متعدده
اللي قصت شعرها وطلع وع
واللي طلعت لها حبة شباب في خشمها
وقاعده طول الليل تراقب ذا الحبه لين تعبت نفسيتها ..
ميسي مهيب حبة شباب
الزبده أن الطلاب ما يصفى لهم من دراسة ال8 شهور الا 18 يوم
اما المدرسات والموظفات:
فحدث يا اها بس ولا حرج
اجازات مثل الاجازات الرسميه للطلاب والطالبات
واضيفوا لها اجازات مرضيه اثناء الحمل
واجازات نفاس ممكن توصل ل 3 شهور
عشان كذا المدرسات هن اكثر من يحمل ويولد
بزعمها انها بتكثر امة الاسلام وهي تبي تتبطح وتتسدّح
طبعا اضافه للاجازات المرضيه بانواعها
المدرسه تراجع كل التخصصات الطبيه علشان تجيب منهم اجازه
اسنان وانف واذن وباطنيه وبوليه وجلديه ونساء وولاده
وعظام واصابات ملاعب
وأجازه علشان فيها ضيقه وشاكه انها منظوله على طاري الضيقه ..
أقسم لوكان للرقاة الشرعيين صلاحيات منح اجازات مرضيه
ان ما تلقون مداوم في مدارس البنات الا البواب والفرّاشه و5 طالبات دافورات
نرجع لمحور حديثنا ..
وغياب بعض ايام الاربعاء لانها بتروح لزواج
ولازم تمسك سرا عند الكوافيره من الضحى
واجازه مرضيه بعض ايام السبت لانها كانت عازمتن حمولتها وتعبت
مع ان حمولتها كانوا عندها يوم الاربعاء ..
الحين الشغاله هي اللي تتعب ، وسعادتها هي اللي تاخذ اجازه!!!
*****************************
انا اقترح اقتراح بيفيد الانسانيه
وهو اننا نتناسب نحن واليابانيين
نتزوج منهم ويتزوجون منا
نعطيهم مما اعطانا الله من زود العيون
ويعطونا مما اعطاهم الله من زود العقول
نعطيهم مما اعطانا الله من الحرص على المظهر
ويعطونا مما اعطاهم الله من الحرص على الجوهر
وهكذا ننتج للانسانية نسل يحبه قلبك..
والله يا نها بتنبسط فينا ذا الانسانيه
!!!!!!!!!!!!!!!!!!!!!
هاه !!
لا لا
هونت عن اقتراحي
اخاف ان تاثيرنا يكون اقوى
في الفهاوه والدلاخه والرفاله والرباده
وتاثيرهم يكون اقوى في صغر العيون وحب الجوهر
و تطلع عندنا سلاله تحوم الكبد
همن عاد تقعد بها الانسانيه ..
دلاخه وعيونن نقوب ..
ولا مظهر ولا جوهر ولا سوني ولا متسوبيشي
*************************************