[IMG]موضوع محرج شوية
=============
بعد أن عاد (سليمان) إلى موطن إغترابه كان على اتصال دائم بمديرى المشاريع الثلاثه لاستطلاع الأخبار فكان صوتهم يأتيه مجللا بالفرح مؤكدين ان الأرباح تجاوزت المخطط بكثير ومضى العام فى لمح البصر . ما أن وصل (سليمان) فى إجازتة حتى تقاطر عليه الأقارب والأصدقاء للسلام والتحية وإمتلأ صالون المنزل حتى فاضت جنباته بالزوار الذين كان يقوم بخدمتهم وإحضار البارد والساخن لهم (إسماعيل) ما أن تناقص عدد الزوار حتى طلب ( إسماعيل ) من سليمان أن ينتحى به جانبا وبعد مقدمة طويلة حاول فيها ( إسماعيل ) أن يكون حديثه فيها منمقاً ومقنعا وقد علت وجهه مسحة من الخجل والحزن معاً قام بتخفيض صوته :- قائلاً - هو فى موضوع ….. محرج شويه - خير إن شاء الله - والله أصلو الحافلة …- مالا ؟ صدمت ؟ - لا ما صدمت لكن ..- لكن شنو ؟ حصل ليها شنو؟ - أصلو كان مرة أشتريت ليا زيت مكنة مغشوش من السوق قام (صلب) المكنة
طيب ما إتصلت فينى ليه عشان أرسل ليك مكنة ؟
قلت ما أزعجك وإتصرف قمت إشتريت ليا مكنة جديده بالدين ( شيكات وكده ) على أساس أسدد قيمتها كل شهر شيك بى 500 الف
أها و بعدين ؟
بعدين كنت ماشى السوق الشعبى شايل ليا ( فرده ) قام دخل فينى ( إسعاف ) لجن الحافلة من قدام
والغلطان منو ؟
غلطان ( الإسعاف ) طبعن
(وما صلحو ليك (الحافلة
لا لأنو قالو أى زول يعمل ( حادث ) مع إسعاف ( الزول ) هو الغلطان !!؟؟
وعملت شنو ؟
قمت شلت تاانى كم مليون كده من الزول الشلت منو ( المكنة ) – برضو بالشيكات - صلحت بيها الحافلة وبديت أشتغل لكن الظاهر ( عمود النص ) و
الجربوكس الصدمة بوظتهم طيب ما كان تمشى تشيل من الزول القاعد تشيل منو؟
أبى يدينى عشان ما سددت ليهو!!؟؟
!! أها وعملت شنو
- فكيت اللساتك الأربعة والاسبير قلت أقوم أرفعا وأبيعهم أشترى بيهم ( عمود نص وجربوكس ) وأجهزا ولمن تجى نشتريهم تانى وننزل الزلط .. لكن
- لكن شنو ؟
ختيتهم فى بوكس عشان أوديهم السوق الشعبى سيد البوكس ( زاغ ) بيهم

وعملت شنو؟
فتحت بلاغ ضد مجهول وكل يوم طالع ونازل مع ناس ( المباحث ) لحدت ما شويت القروش العندى القاعد إتحرك بيها كملت
وبعدين؟
وقفتها قدام البيت قام الشماسة بقوا ينوموا فيها وقطعو المقاعد كلها
وبعدين ؟
بعتها بى حداشر مليون أديت الزول العشرة مليون الشلتهم منو والمليون الفضل أهو ده !! وده الدفتر فيهو الدخلتو والمنصرف !!؟؟
لم تمض أيام قلائل وبينما كان المنزل يعج أيضا بالزوار المهنئين بسلامة الوصولحتى طلب (خليفه) جار سليمان فى الحى ورفيقه منذ الصغر أن ينتحى به جانبا
وبعد مقدمة طويله حاول فيها (خليفة) وقد علت وجهه مسحة من الخجل والحزن معاً قام بتخفيض صوته قائلاً : هو فى موضوع ….. محرج شويه
- خير إن شاء الله
- إتصور يا (سليمان) إنو نص الخرفان ماتت قبل ما نبيعها بيومين
- إيه ؟! ماتوا كيف يعنى؟
- أمر الله….. مرض معدى
- أنفلونزا الخرفان ؟
- ( لا ( نزلات مائية
- طيب والنص الثانى ؟
- الحمد لله لحقتهم قبل ما يموتو ويحصلو ديلك وقمنا بعناهم كلهم بنصف السعر
- كيف يعنى ما فاهم ؟
- نحنا مش كان إشترينا مية خروف الواحد بى ميت الف ؟ صاح؟
- أيوة صاح
- يعنى يبقى المجموع كان عشرة مليون .. أها والترحيل والعلف والحاجات دى إتنين مليون يبقى المجموع إتناشر مليون؟ صاح؟
- أيوه صاح
- طيب خمسة مليون ده تمن الخرفان الماتو .. دى خلاص إنتهت ..ومليونين ونص ده تمن الخرفان البعناهم بى نص القيمة لمن نطرح منهم الإتنين مليون بتاعت(العلف) والترحيل يكون فضل ليك الخمسميت ألف دى … اهو ده الدفتر أنا كاتب فيهو أى حاجه ..
فى اليوم التالى دق باب الشارع ليجده (كمال) شريكه فى محلات الإيسكريم والذى بعد أن جلس لمده دقائق بين ضيوف المنزل الذين أتوا مهنئين (سـليمان) بسلامة العوده حتى طلب (كمال) من سليمان أن ينتحى به جانبا … إنقبض قلب (سليمان) بشده وهو يحس ان (القصة) تتكرر مرة أخرى وبعد مقدمة طويله حاول فيها (كمال) أن يكون حديثه فيها منمقاً ومقنعا وقد علت وجهه مسحة من الخجل والحزن معاً قام بتخفيض صوته قائلاً
- هو فى موضوع ….. محرج شويه
صرخ (سليمان) وهو يتوقع الكارثة الجديدة
- موضوع شنو كمان !!! الحكومة منعت أكل الآيسكريم؟
- الحقيقه لا .. بس
- بس شنو ؟ خير إن شاء الله
- إنا قفلت المحل
- ليه
- والله لمن بدينا كنا قاعدين نبيع كويس لكن بعد شوية …
- بعد شويه حصل شنو؟
- الشارع كلو فتح محلات إيسكريم
- وإنت ما قلت الشارع بستحمل محلين تلاته والناس كتار والطلبه والمدارس وشنو ما بعرف
- أيوه مع الناس الفتحت دى لكن برضو كنا بنربح
- طيب قفلتو ليه؟
- ما أصلو ما كنا عملنا الرخصة وما دفعنا الضرائب وكمان ناس الزكاة طالبونا ورسوم النفايات إتراكمت علينا وكمان الكهرباء والموية والإيجار كان لازم نسدد الحاجات دى كلها
- وسددتها من وين؟
- ما كان فى طريقه إلا نقوم نبيع المكنات والجنريتر والديكور – مواصلا- إنت كنت أديتنى خمسطاشر مليون ونص صاح؟
- أيوه صاح
- ( وهو يناوله( الدفتر) كل حاجه مكتوبه بالمليم… الحاجات السددناها كلها من إيجار وضرائب وشنو وشنو سبعة وعشرين مليون ونص يعنى كده أكون عاوز منك إتنين مليون ونص بس انا ح أتحملهم لأنى السبب
=====================================
وأنت تسير فى برندات ( شارع الجمهورية ) سوف يتجه نحوك شخص نظيف لا تبدو عليه أى علامات غير طبيعية سوف يستوقفك قائلاً
- ياخى بس لو سمحت … بس هو موضوع ….. محرج شويه
( لا تعتقد أنه يود ان يتسول ……… إنه ( سليمان ...

-:مواضيع أخرى تفيدك:-

• تعالوا شوفو ايش سويت لكم
• شوية تصاميم...><
• بسرررعة شوفو زوجة روك لي