|
|||||||
| روايات وقصص - روايات طويلة وقصيرة روايات وجديد الـ رويات الطويلة و روايات قصيرة قصص رائعة, روايات كتابية, قصص مؤثرة, قصص محزنة, روايات |
|
!~ آخـر 10 مواضيع ~!
|
|
|
|
إضغط على
او
 لمشاركة اصدقائك! |
 |
|
|
أدوات الموضوع |
5.00 من 5
عدد المصوتين: 3
|
انواع عرض الموضوع |
|
|
|
#1
12-05-2011, 05:34 PM
|
||||||
|
||||||
|
فتحت الكيس ابى البس عبايه جدتى
وكانت ......... عبايه بس بدون غطاء او حتى طرحه ياربى وش اسوى الله يهديك ياجدتى وش اسوى انا بس بالعبايه لحالها طلبت من نوير تعطينى طرحتها ولبستها لبسه قشرا ولبست عباه جدتى وطلعت ودى الارض تنشق وتبلعنى من الفشله وركبت سياره اخوى بسرعه ومشينا للبيت واخوى بدا الهواش لو انتى حريصه على عباتك ما ضاعت وش اسوى فيك وبعدين شوفى شكلك كيف تفشلين وانا ساكته وانا ساكته طرت على بالى حمده الساكته ادرى مو وقته بس جت على البال وقلت ياربى كيف متحمله تسكت لانى عجزت اسكت وصرت اتهاوش معى اخوى بالسياره وانا وش ذنبي هى انسرقت تبينى من اجى الصبح اظل ماسكه فيها الين الظهر وصار اخوى المسكين يقطع الاشاره مايوقف عندها يقول شكلك فشيله ووصلنا البيت ... ولقيت اخوى مر من عند البيت وتعداه ولف من الشارع الثاني؟؟ ليه انتى ماتشوفين جارنا ابو دحيم واقف عند بابه تبينه يشوفك انتى وعبايتك وصار اخوى يدور بالحاره مو حارتنا حاره ثانيه لين مافضى شارعنا ودخلت البيت بقيت اصلى ركعتين حمد وشكر لله ماصدقت وصلت ............... الساعه سته فى اليل دق التلفون نوير تسال عن طرحتها هع لاتخافين بجيبها لك بكره واذا تبين معها عبايه جدتى ابشرى بعد هع نوير : سليله تعالى معنا نروح السوق سوق .... فيه تخفيضات بلايز وتنناير لا ما اقدر اروح اخوى عقب عباتى اليوم بيحرم على الطلعه شهر من بيروح معك انا وامى ومتواعده مع نجود بالسوق اها نجود بتروح معكم ايه طيب موفقين خير .... يتبع ^^ 
|
| 3 أعضاء قالوا شكراً لـ &ورد الجوري& على المشاركة المفيدة: |
|
12-05-2011, 05:38 PM
|
رقم المشاركة : 2 |
|
شكراً: 70
تم شكره 233 مرة في 78 مشاركة
|
رد: روايه تصدقون زميلتي طلعت ولد..
.
.........
وجاء يوم جديد نفس الروتين قومه من الصبح وريحه قهوه جدتى تصحى الميت وزحمه سيارات وطريق ملل ومحاضرات وصلت الكليه الساعه سبعه ياربى بدرى باقى ساعه كامله على المحاضرات دخلت من البوابه ماكان ودى افصخ عباتى كان ودى اظل فيها طول اليوم اضمن شلت شنطه يدى ومشيت بالساحه مريت من عند النافوره الكبيره بالساحه كانت مفتوحه والمويه شكلها يجنن وقفت اشوفها من بعيد وهناك حول النافوره طالبتين يصورون بعض!!!!!! بالجوال كل وحده تعطى الجوال الثانيه وتصور عند النافوره شكلهم بيقولون هذى صورنا بالصيف لما رحنا باريس وجزر الواق واق اعرف فشخره بنات كذابه .... مريت بطريقى الكافتريا ووقفت عند الشباك وطلبت واحد مويه وفتحت شنطتى ادور ريالين المويه بريالين بالكليه وجت طالبه ووقفت وطلبت بعد مويه وكانت الطالبه حامل وبطنها قدامها وتاخرت العامله ماجت راحت تجيب مويه ولا جت ... طولت وصارت الطالبه الحامل تهاوش وش فيها تاخرت مو قادره اوقف تعبت طيب روحى اجلسي على الكراسي وانا اجيب لك المويه مشكوره وجلست البنت على اقرب كرسي ووصلت العامله معها المويه وحاسبت ووصلت عند البنت واعطيتها علبه المويه يوه يؤ يؤ يؤ لقيت البنت تصرخ وش فيك من عطاك علب المويه العامله ليه ولقيت البنت رجعت للعامله وتهاوشت معها وقاروره المويه بيدى طالعت بتاريخ الانتاج لسه باقى سنه وش فيها تصرخ رحت عندهم وسالت البنت وش فيك ؟؟؟ قالت ليه تعطينا مويه نساح!!! طيب وش فيها مويه نساح ؟؟ انتى خبله مويه نساح مويه مكرره يعنى مويه بيارات الله يعز السامعين يكررونها وتنشرب ؟؟؟؟؟؟؟ معقوله ايه ورجعت المويه للعامله وطلبنا مويه ثانيه قالت العامله وشو مويه يبى انتى؟؟ قالت الحامل جيبى القصيم هنا حائل عذبه اى شي الا نساح بتذبحينى انتى.. مشكوره اول مره اعرف المعلومه لا الشي معروف ..... وصلت القاعه وانا احرك القاروره بيدى واسئل نفسي كم قاروره مويه نساح شربت من جيت؟؟؟ وصلت القاعه.......... وكان كل همي اليوم اعتذر من فضه اخت حمده لانى ماقدرت اكلمها على الموعد امس من مشكله عباتى جلست بالقاعه ولقيت نوير دخلت هلا نوير هلا مشكوره هذى طرحتك تفضلى العفو اخبار السوق امس اشوفك لابسه بلوزه جديده البارح شاريتها ايه وش رايك زوينه وش زوينه تدرين كم قيمتها كم؟؟ 350 يؤ وع مو حلوه والله لو القها بلاش ما اخذتها وزعلت نوير وحبيت اصلح الموقف ايه بس فيها شي واحد حلو وشو انتى الى لابستها الثوب من راعيته وضحكت وطاح الحطب سليله يووه لو تدرين وش صار امس بالسوق وش صار؟؟؟ نجود ايه وش فيها جت على موعدها امس بالسوق ايه جت وشفت لها موقف الله لايوريك؟؟ خير وش شفتى اخاف تعلمين احد من البنات لا لا مو قايله قولى دخلت محل وامى راحت محل ثانى وبالصدفه شفت نجود بمحل رغم انى مواعدتها بس ماكنت احسبها جت لانها مادقت على طيب دخلت المحل ولقيتها ايه كاشفه وجهها لا من جدك انتى ايه وتضحك مع البائع اعوذ بالله معقوله ايه للدرجه وصلت فيها ايه وقبل ماتكمل نوير كلامها دخلت وحده القاعه معها مويه نساح نطيت عندها وتركت نوير.... لاتشربين المويه ليه مويه بيارات وضحكو البنات وقعدت اقص لها القصه ... التفت لقيت نوير مكانها رجعت لها بسرعه اممممممممم والله نجود مجنونه اتوقع منها كل شي يالله من جد ايه يالله ترحمنا برحمته... و بدت المحاضره ودخلت الدكتوره تشرح علم العروض تقطيع الابيات الشعريه وبحور الشعر العربي فعولن فعولن فعولن مفاعيل مفاعيل ويجيك النوم .... وبنص المحاضره دخلت نجود القاعه متاخره طلعت فيها جلست نجود وعينى عليها نجود بنت ما ناقصها شي جمال وبنت حموله وعائله معروفه يا ترى ليه تسوى الفاعيل ليه ممكن قله راقبه من الاهل ..... انتهت المحاضره الاولى لمحت حمده جالسه على نفس الطاوله ابتسمت لها من بعيد ولا ردت على قعدت القط وجهى من الفشله قلت يالله كسبنا صدقه رحت عندها وسلمت عليها الحمدالله على السلامه حمده سكوووووووووووووت ليه غايبه عسى ما شر؟؟ سكوووووووووووت انا امس رحت فوق عند اختك فضه وسالت عنك!! سكوووووووووووووووووت طيب كتبتى محاضره اليوم حابه انقلها منك؟ سكوووووووووووووووت وانا واقفه مكانى جت وحده من البنات تركض بسرعه بنات .... بنات .... بنات ... بنات الحقو,,, الحقو وشو هوشه هوشه تحت بالساحه لاتفوتكم !!! وهجوا البنات على تحت ركض ركضت خطوتين وشفت حمده ماتحركت من مكانها حمده تعالى شوفى البنات !! سكوووووووووووت نزلت تحت مع البنات اشوف وش السالفه!! لقيت الساحه مليانه مافيه مغز ابره وش الزحمه طالبتين متهاوشين وقفت ما اشوف شي طلعت الدور الثانى قلت اشوف من فوق احسن الدور الثانى مفتوح على الساحه وصلت فوق لقيت زحمه بعد كل اقسام الكليه طلعت تشوف!! من بعيد شفت المعركه الضروس بينى وبينكم ياشين هوشه الحريم شد شعر وعض ورفس ومانى قايله وانا قاعده اتفرج على المهزله من فوق تذكرت مباره شفتها بالتلفزيون عن مباره نسائيه وكانت المباره مصريه وللحين قاعده اتذكر المعلق كيف كان يعلق على المباره وهو يقول: مرفت ايوه ايوه مرفت بتجرى بالكوره سعاد جت بسرعه الله الله دى مديحه بتجرى ناحيه المرمى ههههههه ضحكت وانا اتابع الهوشه جت فرقه من الامن بالكليه ووقفت الهوشه وجاءت مسؤله من مكتب اشراف الطالبات وفرقوا البنتين وكانت الاشكال دمويه شوشه منفوشه وخدوش بالوجه وسحبت المشرفه البنتين عند الاداره وشفت وحده منهم حافيه فقدت جزمتها بالهوشه!!! رجعت القاعه لقيت حمده مكانها ماتحركت ياربى البنت حمده ماشفتى البنات سكوووووووووووووت والله انك مشاء الله عليك تصدقين حاسدتك الله لايضرك سكوووووووووووووووت ايه ما تهتمين بالامور الصغيره وانتى الوحيده الى مارحتى تشوفين الهوشه ثقل وعقل ربي يحفظك... سكوووووووووت بالحظه وعقب كل المدح بقيت انا اسوى هوشه بالقاعه واكفخ الحمده كل السكوت ياربى ماتحس كلمه وحده بس مو معقوله البنت... ومر شهر وثنين والبنت ساكته كنت كل يوم اصبح عليها بالخير وسكووووووووووت اليوم وقفت عندها وقلت: حمده انا قررت قرار طالعت فينى بصمت!! قلت انا بكره بسكت مارح اتكلم حرف واحد بسوى مثلك بجرب عالم الصمت عالم السكوت بشوف اقدر او لا ؟؟؟ سكوووووووووووووت وفعلا جاء اليوم الموعود وفشلت فشل ذريع ما اعرف ياجماعه لازم اهذر... رحت عند حمده وقلت: انا اعلنت الهزيمه انتى غلبتينى بسكوتك وطلعت من جيبى منديل أبيض وقعدت الوح فيه هع استسلام ... ..... في يوم جيت مثل العاده الصبح وكنت تعبانه ووصلت القاعه وحطيت راسي ونمت على الطاوله حسيت بحركه عند راسي فتحت عيونى وصحيت لقيت حمده واقفه عندى!!! الصراحه خفت حمده قايمه من مكانها وجت عندى غريبه صرت اطالع فيها وبالكرسي قلت يمكن احلم ... وانا بقمه دهشتى جاءنى صوت يقول: سليله ممكن اتكلم معك ؟ نطقت نطقت نطقت نطقت معقوله مو مصدقه اخيرا نطقت ماعرفت اقوم من مكانى.. ولا عرفت انطق عدوه السكوت وصلت عندى صرت انا الساكته وهى تتكلم انقلبت الادوار... هزيت راسي لها بالموافقه ونطقت .. ممكن اكيد ممكن انا اسمعك قولى قالت: لا مو اليوم خليها وقت ثاني انتى اليوم شكلك تعبانه لالا مو تعبانه هذا الله مير يسلمك البارح عندنا عشاء وقعدت اكرف للصبح بالتنظيف وجدتى نامت المغرب وخلتنى لحالى وضحكت وضحكت معها... وجت نوير نوير تعالى شوفى حمده نوير: هلا حمده سكووووووووووت ورجعت حمده مكانها نوير : وش فيك انتى نطقت معقوله ايه قالت بكره بتكلم معك ؟ لا والله شكلك تحلمين شوفى شوشتك كيف منفوشه وخشتك وارمه توك قاعده من النوم كملى نومتك احسن لك!! التفت عند حمده وشفتها من بعيد وابتسمت لها وابتسمت والوعد بكره ياترى وش سر الحمده وليه طلبت تتكلم ياترى وش بتقولى : ردت نوير بتقولك ترى ازعجتينا ولاعاد اشوفك جايه عندى كل صبح رازه خشتك تصبحين وترى اذا مابطلتى تهذرين كل ماتشوفينى بعلم عليك امى وضحكو البنات.......... بس مو مهم اهم شي اشوف وش عندها... باقى اعترفات حمده حابين تسمعون الاعترفات.... صباح جديد من صباحات روتينيه تحمل نفس الحركات والهموم دقت الساعه عند راسي الصبح وما قدرت اقوم خبطتها بيدى وجبت اجلها عاد انا سمعت عن اختراع ساعات تطير فى الجو يعنى لما تدق الساعه تطير بالغرفه وانت بالحاله تظطر تقوم تلحقها عشان تطفينها قلت ليتنى اجيب وحده زيها واقعد اطارد وراها بالغرفه كل صبح اليوم الاربعاء ازين ايام الاسبوع اكيد لبست ملابسي ونزلت بسرعه يالله تصبحها بالخير جدتى هلا انتبهى وانا امك على عباتك لاتفصخينها ابدا ابشرى ماتبين فنجال قهوه يقعد راسك لا جدتى مايمدينى يالله امكن واروح طيب ,,, منو بيودينى الكليه اليوم ؟ كلهم طلعوا... شلون طلعوا وخلونى .... دقيت بسرعه على ساره بالجوال ردت على أغنيه تقول مو خساره مو خساره يابعد عمر ساره !!! يالله صباح خير اخيرا ردت الو ساره هاه اسمعى طلعتى من البيت او للحين ؟ لاتونى مابعد جاء الباص حلو اجل تكفين خلى راعى الباص يمرنى ماعندى احد يودينى زين وجاء الباص وعو ما احبه بس للظروف احكام ركبت الباص يوووه زحمه مالك مغز ابره كل الاماكن كل هذولا بيتخرجون ويطحون فى عالم البطاله مامن وظائف تضفهم يعرسون ابرك كلها خدمه للوطن!!!! هع وقفت بالباص كنى خبله وتذكرت الافلام المصريه وحنا بتوع الاتوبيس وقلت الله يعين وشفت يد من بعيد تلوح لى حلوه تلوح هذى مدرى كيف جت هع هذى ساره ياحليلها حاجزه لى مكان جنبها تعالى انثبرى وش فيك اشر لك وانتى مو هنا... لا ابدا افكر بالخريجات وخدمه الوطن !!! وشو ... وش الخرابيط اقول انثبرى بس ... وجلست جمب ساره وكانت ساره قاعده جمب الشباك!! اقول ساره هاه ليه انتى الى جالسه جمب الشباك خلينى اجلس انا اقول طرار ويتشرط الحين احمدى ربك الى رديت على جوالك الصبح واحمدى ربك الى خليت راعى الباص يمر بيتكم واحمدى ربك الى حاجزه لك مكان انثبرى بس... طيب ,وو والله صادقه الحمدالله الذى لايحمد على مكروه سواه,,,, ساره وش فيك تعبانه او متضايقه ؟ مافينى شي لا فيك خير ..... ياربى ارمى نفسي من الشباك وترتحين ,,, وشوى وبكت ساره !!!!! يؤ يؤ ساره انا اسفه ماقصدت ازعلك وش فيك ؟ ابوى ,,, ابوى ياسليله... وش فيه ؟؟ للحين مصر على رايه ... اها فهمت ابوك للحين بيزوجك ولد عمك وانتى رافضه ايه البارح قالى مالك غيره رضيتى او انرضيتى لو تنقزين لسابع سماء مالك الاهو ... حاولى ياساره تتكلمين مع ابوك هذى حياتك ... عجزت ,,, عجزت انتى ياسليله فاهمه علي ,,, والله فاهمه ياساره ,,انتى محجوزه مثل كراسي الباص بس الشكوى الله مابيدى شي اسويه لك .. ادعى ربك والفرج من عنده... لا مو فاهمه ياسليله ... مو فاهمه ... ووقف الباص عند الاشاره عاد الاشاره غثه طويله يمدى ساره تاخذ ولد عمها وتجيب عيال والاشاره باقيه مافتحت ... ساره تكلمى وش فى خاطرك؟ مو فاهمه انك تتزوجين واحد ماتحبينه مافيه ترابط بينك وبينه .. طول عمرك ماحسيتى باى احساس له ... ياساره انجح الزوجات الحب بعد الزواج والعشره .. اقول اسكتى هذا كلام جدتك اجل وشو الى انا مو فاهمته ... فهمينى ,,, سليله ,,, ياخير,, انا ايه انا احب يؤيؤ والله ايه وهو يحبك مادرى لاحول ولاقوه الابالله وش القراده حب من طرف واحد واكتشفت ان ساره تحب ولد خالتها من سنين.. بس من بعيد سليله خير تعتقدين يحبنى ؟؟ ههههههه الحمدالله والشكر يابنتى افهمى على واذكرى ربك هو من العائله صح صح ويدرى بسالفه خطوبه ولد عمك لك صح صح اجل مافكر فيك ولاجاب طارى لك .. لو فيه بقلبه شي كان تحرك وتكلم .. وهنا فتحت الاشاره ووفتحت عيون ساره وقامت تصيح .... طالعت بساره بكل حسره ... بنت جامعيه بس للحين مالها حق وكلمه بشريك حياتها الاب يقرر ويوافق حال ساره مثل حال كثير من البنات ترفض واقع مفروض عليها وتحب بصمت تركت ساره تبكى وتبكى يمكن ترتاح من هموم وفجاءه والباص يمشي صوت صراااخ لالا يوووووووووه يمه قله ادب ياقليل الحياء يالى ماتستحى على وجهك واختبص الباص والى واقفه جلست والى جالسه قامت.. وواقف راعى الباص ونزل من الباص؟؟؟؟؟ وش فيه وش صار ؟؟؟ سياره صغيره كانت تمشى ورا الباص ومسويه ازعاج للبنات الى اخر الباص ساره : يقولون شباب مسوين ازعاج للبنات الى ورا وانتى وش دارك يمكن البنات معطينهم ضوء اخضر .. الحين مين الى صرخت وتقول قله ادب هذى شوفيها الى جالسه ورا... وجتنى حساسيه لازم اعرف وش السالفه وسالت البنت الى جالسه وراى لو سمحتى,,, وش السالفه وش فيك ماتسمعين لامعليش كنت نايمه اخذت غطه تونى اقوم ليه الباص واقف الظاهر وصلنا يالله ننزل... اى وصلنا انتى كملى نومتك ابرك هذولا شباب يلحقون الباص ههههههههههههه من جد والله ايه ماتشوفين لا والله ماشفت كنت ايه نايمه ايه صح ومشى الباص ...... وصار ازعاج كل البنات يتكلمون بسالفه التفت لساره وقلت زين الحين صار فيه خبر الموسم يهذرون فيه البنات ووصل الباص ودخلت الكليه وطلبت من ساره تروح تغسل وجهها منتفخ من كثر الصياح ....... مريت الكافتريا مثل العاده وانا واقفه سمعت بنتين يتكلمون يقولون شباب دخلوا على باص بنات من كليتنا !! ايه ويقولون هددوا السائق بمسدس والبنات تصرخ ايه وسمعت بعد ان الشرطه والهلال الاحمر والدفاع المدنى جوا ايه وسمعت بعد انهم مسكوا بنت رهينه وطلبوا سياره واخلاء سبيلهم او يذبحون البنت!! ههههههههههههههه كل هذا سمعتوه ايه متى؟؟؟ تو الباص واصل!!! سمعنا ان فيه بنات اتصلوا على بعض وقالو الباص محاصر!!!! لا انا سمعت ان الباص صدم واحترق وماتو كل الى فيه .... ههههههههههههه طلعت القاعه وانا على الدرج شفت منيره تركض.... منيره هلا سليله وين ؟ بروح الحاضنه تجين معى ,,و يالله ونزلت تحت قسم الحضانه خاصه بالاطفال اطفال الطالبات والموظفات بالكليه كان ولد منيره عليه حراره الله يهديك بس كان ماجيتى اليوم وغايبه دام ولدك مصخن,,, ما اقدر عندى غياب واجد دخلت الحضانه وشفت الصغار يهبلون اللى نايم واللى يبكى واللى هادى ياربى وش ذنب الصغار يجون من صباح الله خير المفروض الواحد الحين بفراشه الشكوى لله تطمنت منيره على ولدها ورجعنا القاعه ... دخلت القاعه وبسرعه جت عيونى على كرسي حمده.. اليوم بتتكلم معى ان شاء الله تتكلم ولاترجع لحاله الصمت .. شفت حمده جالسه مكانها مثل العاده.. وصلت عندها ... صباح الخير هزت راسها وضحكت... حمده .. انا جاهزه اسمعك اليوم انتى للحين عند وعدك .. وهزت راسها مره ثانيه ,,, ورجعت مكانى ودخلت نوير .. هلاسليله هاه بشرى حكت معك ابو الهول ؟؟ لا للحين بس عند وعدها... تدرين نوير لو ماحكت بحطها بالباص حقنا الى يركب فيه يتعرف على طول قلت الكلام وعيونى على ساره الى غسلت وجهها وللحين الدمع بعيونها ... دخلت ريم القاعه صباح الخير يالربع هلا ريم هلاسليله اقولك اليله زواج ولد عمتى ,, تجين للعرس وين عرسكم بالقاعه ذيك الى على الشارع ايه ايه عرفتها تجين اعطيك بطاقه عطينى بس ترى جدتى بتجى معى حياك الله انتى وجدتك واخذت بطاقه من ريم اليوم الاربعاء واليله الزواج ووزعت ريم بطاقات على بنات القاعه نوير تروحين .. ايه مسكت البطاقه ورحت عند حمده حمده ماتجين للعرس اليله تعالى وسعى صدرك ونزلت راسها و بدت المحاضره ... كانت ماده عامه وثقافيه ودكتور الى بالشاشه اعمى مايشوف سبحان الله ومعه دكتواره سبحان الله يارب ... انتهت المحاضره وبسرعه رحت عند حمده حمده تعالى نتمشى شوى برى القاعه وأول مره حمده تقوم وتطيع وطلعنا .... حمده نعم انا اسمعك ممكن تتكلمين اتفضلى ... وش تبينى أقولك ؟؟ قولى الى بخاطرك اى شي مو ضرورى تقولين لى ليه حاله السكوت عندك مو مهم قولى لى هوياتك اهتمامتك وش تحبين وش تكرهين و احب الكوره والسيارات؟؟؟؟ طيب عادى فيه كثير يحبون النوع من الرياضه لو انها ماتناسب البنت ... بس ممكن ليه لا وانتى ماتحبين الكوره والسيارات انا لا مالى علاقه فيهم صراحه يعنى ماتشجعين فريق؟؟؟؟؟ لا اشجع المنتخب... غريبه ووين الغرابه حسبتك تشجعين الفريق هذاك... وش معنى الفريق هذاك.. لان أغلب البنات يشجعونه ولان اخت اللاعب هذاك موجوده معنا هنا بالكليه ايه شفت اخته والبنات حولها زى النمل عشان اخوها الله لايبلانا... طيب حمده مارح تجين العرس اليله لا ماظن .. ليه ؟؟ ما احب العروس وجع راس تعالى اتفرجى على الموديلات والتسريحات و هذى كلها خرابيط واكتشفت ان حمده مالها ميول ابد بالموضه والمكياج والتسريحات والملابس وطالعت فيها شعرها مو مقصوص مربوط على بعضه اظافرها ما اطن بيوم بردت الاظافر او حتى حطت مناكير مثل البنات .... حمده نعم ليه كنتى ساكته طول المده؟؟ او ليه قررتى تتكلمين اخيرا ؟؟ ماحد فاهمنى ياسليله شلون ابوى من ولادتى كان رافض وجودى لما بشروه انى بنت زعل وتضايق من جيت على الدنيا وانا احس انى شؤم ووباء على أقرب الناس لى ... فى الشهر الى جيت فيه ابوى طلق امى ورجعها بعدين بس للحين كل ماتشوفنى تقول من شفتك ماشفت خير ابدا اخواتى البنات الى أصغر منى كلهم تزوجو وانا ما احد فكر يخطبنى لانى شينه ولاعندى اسلوب مثلهم ولا عندى طلعات وروحات واختلاط مع الى حولى دايم لحالى .... طيب حمده وش رأيك بالزواج ما ادرى شلون نط السؤال قدامى ردت احس نفسي مشاعر جامده وش مشكلتك ياحمده؟؟ ممكن تكونين بعيده عن الله؟؟ لا لا انا الحمدالله اصلى وقريبه من ربى بس رافضه كل شي حولى رافضه اسمى وشكلى ومجتمعى وحالى احس انى انا مو انا فاهمه سليله؟؟ لا والله مو فاهمه بس حاسه بكل كلمه قلتيها .. ودامك من ربك قريبه هو منك قريب قولى يارب ومديت يدى ومسكت كتفها وفجاءه بعدت يدى ورجعت وراى ؟؟؟؟؟ انا اسفه ماقصدت شي حصل خير بس انا ما احب احد يلمسنى خاصه اذا كانت بنت ؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟ هنا انا قمت اتلفت حولى وش تقصد حمده بالكلمه كتمت تعجبيى وابتسمت بكل غباء وقلت : بس انتى بنت وانا بنت وعادى وصرخت فى وجهى لا مو عادى طيب براحتك ومشينا ووصلنا الحمامات ووقفت قدام المرايه امشط شعرى حمده مشطتى شعرك لا مو ضرورى طيب براحتك وطلعت قلم روج تونى شاريته ودخلت علينا نوير الله سليلع من وين شاريه الروج من بسطه الحريم هع لامن جد لونه حلو مقدم خيتو مايغلى عليك وطلعت نوير مشط ومشطت شعرها وطالعت بحمده من بعيد حمده جربى حطى من الروج لا لا طيب براحتك والتفت نوير ناحيه حمده وقالت حمده فكى شعرك خلينى اسرحه لك شكلك ماتعرفين تسرحين شعرك لا لا مشكوره واصرت نوير على حمده انها لازم تمشط شعرها ووافقت حمده بس بشرط ووافقت حمده تمشط شعرها بس بشرط نطلع من الحمام وتبقى بروحا تقول مايصير تفك شعرها عندنا طلعنا من الحمام وتركنا حمده تمشط شعرها وسط استغراب من البنات قالت وحده منهن مو صاحيه الحمده !! طلعت حمده بعد ما مشطت شعرها ووقفت معها عند صندوق العبايات اتاكد من وجود عباتى عقب ذيك السرقه _ حمده وش تسوين ,, ابد اتاكد من عباتى _ والله انها غثا ,, وشهى الغثا _ العبايه ,, لا ياحمده لاتقولين كذا _ ما احبها تكتم نفسي .. اجل وش تحبين _ احب البس ثوب وشماغ!! ,, ههههههههههه ومشيت مع حمده للقاعه وانا اضحك عليها اجل ثوب وشماغ قعدت اتامل حمده معقوله تكون بنت مسترجله يعنى تتصرف زى الاولاد وكثير بنات مسترجلات بالكليه يلبسون سروال سنه ويحطون عطر رجالى والشعر على رقم ثلاثه والمشيه مانى قايله بس حمده غير ماعندها الحركات وربى الحمده عجيبه ....... في اليل قررت اروح العرس وطلبت من جدتى تجى معى "" جدتى تروحين معى للعرس ,, منهو المعرس؟؟ "" هع جدتى وش عليك منهو المعرس من طرف وحده من البنات ,, زين وانا جدتك نروح بعد المغرب "" هع اى مغرب جدتى مايصير نروح بدرى بعد المغرب مافيه احد نروح متاخرين شوى ويالله ويالله اقتنعت جدتى تجى العرس ووصلنا القاعه زحمه عند البوابه الدخول بالبطاقه والحارس لازم يتاكد من الدعوات وقفت انا وجدتى ننتظر دورنا بالدخول وقدامنا اربع حريم .. الحين انا وش اسوى مامعى بطاقه ,, مايدخلونك دون بطاقه .. طيب والدبره ,, مافيه حل غير واحد من ثنين .. وشو ,, اما نقول للحارس انك جايه معنا وكلنا عايله وحده او ناخذ احنا البطاقه ونعطيك الكرت فاضى يحسبه بطاقه!! ههههههههههه يحليل الحريم اذا جو يخططون مصيبه... ودخلنا القاعه والديجيه شغال خليلو خليلو ,, جماله يجنن وسنه صغير ولقيت ريم واقفه بالاستقبال مع اهل المعرس _ هلاسليله ,, هلافيك _ هذى جدتى ,, هلا بجده سليله وجدتى معصبه مو جايز لها صوت الموسيقى العالى اخذت جدتى وجلسنا على طاوله وقعدت اتلفت ادور احد من بنات القاعه وفجاءه شفت نوير والشله قاعدين فوق القاعه نظام قاعات المسرح والاوبرا ناس فوق وناس تحت وبدا العرس وكان روعه رقص ووناسه والطاقاقات مايطقون اى اغنيه الا بخمسين جت نوير عندى وقالت : يتبع
|
|
|
|
| الأعضاء الذين قالوا شكراً لـ &ورد الجوري& على المشاركة المفيدة: |
|
12-05-2011, 05:47 PM
|
رقم المشاركة : 3 |
|
شكراً: 70
تم شكره 233 مرة في 78 مشاركة
|
رد: روايه تصدقون زميلتي طلعت ولد..
.
,
جت نوير عندى وقالت: سليله ليه ماتجين عندنا .. ما اقدر يانوير اترك جدتى بروحها _ طيب اجلس معك .. وجلست نوير معى نوير _ خير .. منو هذى الى واقفه مع ريم _ هذى اختها تهانى .. مشاء الله عليها وش زينها _ ايه بس مالها حظ .. يؤيؤ ليه _ مطلقه وماتوفقت بزوجها وعرفت من نوير ان تهانى اخت ريم مطلقه من سنتين وعندها ولد عمره اربع سنوات عايش معها بعد ماتزوج طليقها وتعجبت من تهانى جمال وحبوبه ليه تطلقت دنيا ماتعطى احد كل شي التفت لنوير _ نوير .. هاه _ تهانى تدرس؟ .. لا معلمه _ بالله شكلها اصغر من كذا ووين ولدها ؟؟ .. اكيد معها موجود .. ماتقدر تتركه حتى ابوه يهددها انه بياخذه منها لو فكرت تتزوج _ وليه يهددها من حقها تتزوج .. ايه بس بعض الرجال مايكفيه انه طلقها لا يبيها طول عمرها تفعد تخدم عياله ولو فكرت تتزوج اخذ عيالها منها... _ قعدت اتامل تهانى وانا محزنه على حالها وعرفت من نوير ان ابو الولد يهدد تهانى انه بياخذ ولده لو فكرت بحياتها ... وقررت تهانى ماتتزوج ابد رغم انها صغيره وحلوه ومعلمه .. وماعندها غير الولد ولقيت نوير تقول .. حتى الصيف العام كل اهلها سافروا وهى بقت لحالها بالبيت مع ولدها!! _ وليه ما سافرت مع اهلها .. اهلها كلهم راحوا بالصيف لمصر امها وابوها واختها ريم واخوانها ولما جت تهانى تروح معهم كان لازم تجيب موافقه من ابو ولدها عشان يسمحون له بالسفر للخارج تعرفين مايطلع برى الديره الا بموفقه ابوه وابوه رفض وقال لو سافرتى بولدى باخذه منك ومارح اعطيك اذن بسفره... _ اعوذ بالله بعض الرجال لايرحم ولايخلى رحمه الله تنزل.. جت الساعه 12 والرقص شغال وامتلت القاعه وبدت جدتى يجيها النوم... ولقيت جدتى تقول: سليله يالله مشينا _ وين نمشى جدتى تو الناس مابعد جت العروس .. اى عروس عروس الحزه اصبحنا هذولا ماعندهم عشاء ماصار عشاء هذا سحور وللحين مانزفت عروسهم الله يرحم ايام اول امع اذان العشاء كل شي خالص ... نوير ,, ههههههههههه ههههههههه وربى جدتك تحفه ياسليله ههههههههههههه وحاولت اخلى جدتى تقصر صوتها وهى تقول وين عشاهم.. وجت العروس ودخلت القاعه جدتى.. وش فيها مصبغه خشتها الله لا بلانا نوير : ههههههههههه جدتى : وخزيااه شوفوها تضحك ومتشققه راح الحياء خلاص ماهى مصدقه انها اعرست كل الضحك وين حياء بنات اول نوير: خخخخخخخخ يابطنى بطناه من جدتك ياسليله جدتى : بنات اول تجلس اسبوع ماتطلع غير لرجالها وتجلس شهر ماتضحك ولا احد يسمع صوتها وبنات الوقت الله لا يسفهنا ضروسها طالعه قدام الناس نوير.. هههههههه ويمكن ترقص بعد ياجدتى.. وحنا جالسين نشوف العروس والرقص دخلو القاعه ثنتين منقبات الساعه وحده وربع نوير.. سليله وش فيهم هذولا توهم يجون _ وانا وش دارنى عنهم نوير.. شوفى شوفى دخلوا من غير تفتيش على الجوال _ اكيد الحزه مافيه تفتيش الساعه فوق الوحده اللى يفتشون خلاص راحو من عند الباب وجوا اثنتين المنقبات وجلسوا بالطاوله الى جمبنا وسمعت انا ونوير الحوار :: يالله بسرعه خلصينا ,, اصبرى لا تفضحيينا ,, اخاف احد ينتبه :: ماحد يمك اخلصى بسرعه ؟؟ ,, طيب :: وينها الحين ,, شوفيها هناك واقفه على المنصه لابسه ثوب اصفر والتفت انا ونوير على المنصه وفعلا كان فيه وحده لابسه اصفر وشفت وحده من الثنتين طلعت جوال كاميرا _ يؤيؤ يانوير هذولا معهم جوال كاميرا .. نوير ايه اشوفهم _ هذولا جاين متاخرين .. ايه ومتقصدين ام ثوب اصفر بالذات وسمعنا الثنتين يقولون :: يالله صوريها بسرعه خلينى نمشى ,, طيب :: انجزى مانبى احد يلاحظ شى ,, من بيلاحظ الكل لاهى مع الرقص وطلعت جوالها ,,, نوير نوير بيصورون المسكينه وهى غافله لازم نسوى شي ووقفت انا ونوير ورحنا عند المسؤله عن القاعه وعلمنا ان فيه ثنتين معهم جوال داخلين يصورون وحده وجت المسؤله واخذت الجوال منهم ولقيت نوير راحت عند ام ثوب اصفر وعلمتها وسمعت بعدين من ريم ان بين ام ثوب اصفر والثنتين عدواه وكانوا بيصورنها وينشرون صورها لاحول ولاقوه الابالله للدرجه وصل الشر بقلوب الحريم.. الساعه ثنتين.. تقضلوا على العشاء والتفت لجدتى لقيتها نايمه جدتى يالله العشاء .. اى عشاء هذا سحور ,, نوير ههههههههه ودخلنا قاعه العشاء وشافت جدتى البوفيه وماعجبها وقالت: وين المفاطيح ؟؟ وتعشت جدتى ورجعنا البيت ...... ويوم السبت رحت الكليه الصبح وكانت مفاجاءه .... يوم السبت يوم ثقيل تحس كله هم ونكد طويل وملل الساعه خمسه فجر السبت سليله : صباح الخير جدتى جدتى: يالله تصبحها بالخير,, وشعندك جايه المطبخ سليله : اليوم مواعده البنات اجيب لهم خبز صاج جدتى : خبز صاج وتوك تقومين ليه ماقمتى من بدرى الحين قرب الضحى !!! سليله : ههههههه اى ضحى ياجدتى الساعه خمسه الفجر طلعت جدتى من المطبخ مسويه لها قهوه عجنت عجينه الخبز ورحت اشرب فنجال قهوه مع جدتى تاملت وجهها كله حنان التجاعيد رسمت خطوط شقى سنين مرت بس للحين العيون فيها لمعه ... الساعه سبعه كنت داخله الكليه وبيدى حافظه مليانه خبز نزلت الحافظه وعباتى ونزلت الكافتريا وطلبت شاى بحليب وجلست على طاوله اشرب وانا اشرب الحليب: جت وحده من البنات كانت معى من ايام الثانوى وداد : هلاسليله شلونك سليله : هلا واداد انتى اخبار امطار علوم وش صار وداد: هههههه ابدا ساكنه اقولك سليله ماشفتى مشاعل وش جابت معها للكليه اليوم ! سليله : اى مشاعل !! وداد : مشاعل ال ,,,,, الى بقسم الانجليزى سليله : ايه ايه عرفتها وش جايبه معها ؟ وداد : لا انتى احزرى وش جايبه ؟ شي خيال ماتتوقعين ؟ سليله : وش جايبه لايكون جايبه خبز صاج مثلى وداد : ههههههههههاى اى خبز انتى بعد لا لا شي اشد فضيع !!! سليله: بالله وش جايبه مشاعل جايبه جدتها معها وداد : لا لا تعالىمعى اوريك وش جايبه مارح تصدقين .. سليله : يالله مشينا قدام واخذت كوب الشاى بيدى ومشيت مع وداد وداد : ماخلصتى كوبك جايبته معك سليله: ايه تونى شاريته اجل ادفع فيه 3 ريال واخليه وداد : ههههههههه سليله : وش جايبه مشاعل يـــــــــــتبع .,
|
|
|
|
| 2 أعضاء قالوا شكراً لـ &ورد الجوري& على المشاركة المفيدة: |
|
12-05-2011, 05:49 PM
|
رقم المشاركة : 4 |
|
شكراً: 70
تم شكره 233 مرة في 78 مشاركة
|
رد: روايه تصدقون زميلتي طلعت ولد..
[COLOR="rgb(0, 100, 0)"]..
وداد : تصبرى بكوب حليبك لحد ماتشوفين بنفسك ووصلنا قسم الانجليزى وكانت زحمه وصجه على الصبح سليله : وش فيهم زحمه لاتقولين جاين يشوفون وش جايبه مشاعل الله كل هذولا عندهم حب استطلاع مثلى وداد : ههههههههاى تعالى قربى شوفى وشربت باقى كوب الحليب بسرعه ورميته وركضت مع وداد اشوف وش جايبه المشاعل سليله : زحمه ياوداد الحين ما اقدر اشوف شي ,, وداد : اذا ماشفتى بتسمعين اصبرى بس سليله : وش اسمع ؟؟؟ لاتقولين مشاعل جايبه معها مسجل وبترقص هنا . وداد : لا لا شي ثانى ووقفت جمب وداد وسط الزحمه وشفت كلب ؟؟؟؟؟؟؟؟؟؟؟؟؟ كلب صغير ونظيف يلق لق ومربوط برقبته سلسله فضيه سليله: بالله عليك وداد مشاعل جايبه الكلب معها ؟ وداد : ايه شفتى ,, من باب خالف تعرف ولفت النظر كلب بالكليه وويلى ويلاه وشفت البنات يركضون ورى الكلب من مكان لمكان سليله : اقولك واداد الحين هذولا الىىيركضون وراه اول مره يشفون كلب واداد: الظاهر كذا سليله: ليتهم يجون عندنا بالديره عدد الكلاب والحمير أكثر من عدد السكان أنفسهم .. وداد : ههههههههههههههههه شوى والكلب جاء يركض عندنا ولقيت وداد نطت فوق الطاوله كنها ربه المنزل الى مع توم وجيرى هع هع ووصل الكلب عندنا وجت مشاعل واخذت الكلب معها مشاعل : اش اش اش سليله عندنا ,, يامرحبا بالبدويه سليله: هلابك مشاعل وش جايبه معك ؟ مشاعل : هذا دودى سليله : دودى ؟؟؟ مشاعل : ايه كلبى دودى سليله : ايه يتربى بعزك !! ونزلت وداد من على الطاوله مشاعل : ايه ياسليله ماتعرفين دودى انتى بس تعرفين المعز والغنم خلاص بكره اجيب لك عنز عشانك !! البنات : هههههههههههههههه سليله : لا مشكوره شعوله ,, انتى بس انتبهى من دودى ليعضك وتنسعرين وتقومين تنبحين هوه ,,, هوووووه مثله وبعدين مانقدر نفرق بينكم انتى ودودى . البنات : هههههههههههههههه مشاعل : سليله انكتمى والزمى حدك سليله : يووه قامت تنبح من الحين شعوله الحقو يابنات الظاهر عضها دودى هووه هوووه . البنات : هههههههههههههههه هنا كانت بتقوم هوشه ومعركه كبيره بينى وبين مشاعل ولقيت وداد تسحبنى من يدى وداد : سليله مشينا سليله : يالله وسمعت وحده تتكلم مع مشاعل وتقولها خليها لاتتهاوشين معها الحين لو صارت هوشه بتوصل الاداره وبيعرفون ان معك كلب .... لقيت نفسي داخله المصعد الكهربائى وداد : سليله وش فيك انتى بقيت تسوين مصيبه سليله : ماتشوفينها تقولى عنز وداد : انا غلطانه جبتك هنا ووصلت القاعه والبنات كلهم وصلو نوير: هلا سليله وداد وينكم سليله: عند دودى ؟؟ نوير : هااى اى دودى بعد ولمحت من بعيد حمده جالسه مكانها وداد : يالله سليله انا بروح قسمى سليله: وداد اليوم جايبه خبز صاج تعالى افطرى معنا نوير : بالله سليله جد جبتى الخبز عساه واجد بس سليله: وليه نوير : بعزم كم وحده تجى تتفرج بس ماتاكل هههع سليله: اقولك واداد تعالى ابيك بكلمه وطلعت من القاعه ومشيت مع واداد اخ الممر سليله : واداد وش صار على موضوعك ؟ وداد : اخ ياسليله ماصار شي للحين كلش واقف سليله : وش المشكله هو يحبك وانتى تحبينه وتقدم رسمى لك وطلبك من أهلك وداد : صح بس انتى عارفه سليله : للحين اهله رافضين واداد: ايه للحين وراحت واداد لقسمها تـابع ^^ [/COLOR]
|
|
|
|
| 2 أعضاء قالوا شكراً لـ &ورد الجوري& على المشاركة المفيدة: |
|
12-05-2011, 05:59 PM
|
رقم المشاركة : 5 |
|
شكراً: 70
تم شكره 233 مرة في 78 مشاركة
|
رد: روايه تصدقون زميلتي طلعت ولد..
ووقفت اتامل وداد
بنت غايه بالجمال والاخلاق ومن عايله معروفه... تقدم لها واحد وخطبها ووافق ابوها وفجاءه انتهى كل شي لما عرفت ام العريس ان وداد لها أخت ماتتكلم ولا تسمع رفضت ... خافت على ولدها من وارثه الصمم والبكم بالعائله رجعت القاعه : نوير : سليله وش فيك سليله : لا ولاشي نوير: وش صار على زواج وداد سليله : انتهى كل شي نوير: لا لا ماتستاهل للحين امه رافضه سليله : ايه نوير : مادريت سليله وش صار على خوله؟ سليله: وش صار لها ؟ نوير : بعد اهل المعرس رفضوها حرام سليله : وليه نوير :يقولون ماتصلح امها مو سعوديه؟ سليله: طيب واذالا امها مو سعوديه خير ياطير نوير : رفضوا اهله سليله : بس هى تتبع ابوها مو امها وابوها سعودى نوير : ايه صح بس الناس وتفكيرها .. سليله : الحين خوله خسرت الى تقدم لها عشان جنسيه امها نوير : ايه وهزيت راسي عالم عجيب!!!! وجت عينى بعين حمده من بعيد كانت تطالع فينى وانا داخله وطالعه جيت عندها: سليله : صباح الخير حمده حمده: هلا سليله سليله: اقولك حمده اليوم جايبه خبز صاج تعالى افطرى معنا . حمده : ودى والله بس تعرفين اخاف من كلام البنات مايتركونى بحالى سليله : وانتى وش عليك منهم حمده: سكووووووووووووووت وبعد صمت دقائق نطقت حمده: سليله سليله : خير حمده: ممكن اليوم اتكلم معك بالمصلى الظهر اذا ماعندك مانع سليله : لا ابد بالعكس تعالى وجت وقت الفسحه واجتمعوا البنات على الفطور جمانه ( جمانه هذى سوريه معنا بس متزوجه سعودى وجايبه ثلاث اطفال وخذت الجنسيه السعوديه ودخلت الكليه ) جمانه : شو الخبزات هيدا سليله ؟ سليله : هذا خبز صاج جمانه خانم جمانه : شو يعنى خبز صاج نوير : يعنى الله يسلمك عجينه تحطينها على الصاج تقول تشششششششششش البنات : ههههههههههههههه جمانه : لا عم بحكى جد كيف بتنعمل الخبزات بلكى بعمل لبنى عمى متلها يقبر البى بيحب اكل امه كتير .. سليله : جمانه ماتخيل شكلك تخبزين وواقفه على الصاج انتى راعيه تبوله ورق عنب هيك شغلات مو خبز صاج جمانه : شو عم تتمسخرى سليله والله بعرف اعمل متلها بس بتعلم شوى شوى سليله : ولك تقبرى عظامى يا جمانه اعلمك ولايهمك ... هنا نطت نوير ومعها نوره نوير : اهووه ,,,, اهوووه وجمانه بدها تعمل خبز صاج نوره : هوووه ’’’ هوووه نوير : وبدها تطعمى ابن عمها من خبز سليله نوره: اهوووو ,,, اهوووه نوير : كلوووووووووووووووش ههههههههههههههههه وانتهت الفسحه ... وعند صلاه الظهر رحت المصلى اشوف حمده ويوم ________ دخلت المصلى ولقيت حمده جالسه بزوايه المصلى سليله : هلا حمده وراك جالسه بزاويه حقت الشياطين هع حمده : مدرى لقيت نفسي هنا وجلست .... سليله : مو مهم المكان المهم تكونين مرتاحه فيه. حمده : سليله سليله : خير يا حمده تكلمى انا اسمعك اذا فيه بخاطرك شي قوليه.. انا ما ودى اظغط عليك بس حابه من جد اسمعك ,, واشوف وش مضايقك تكلمى ياحمده تخيلى نفسك تتكلمين مع نفسك ماحد يسمعك .. حمده : هههههههه كانك دكتور نفسي سليله : ههههههههه حمده : سليله انا اول مره احكى ,, وماعرف ليه معك انتى ودى اتكلم واقول يمكن لانك انتى الله ارسلها لى وتكتشف وش فينى او لانك انتىالوحيده الى ماكنت تتمسخرين على سكوتى بالقاعه او لانك اهتميتى فينى وانا عمرى ما احد فينى اهتم ... سمعت حمده تتكلم كنها شخص ثانى لا اول مره اشوفها تتكلم بالطريقه سكت وتركتها تتكلم ... وكانت مفاجاءات بالكلام .... حمده رافضه اسمها ورافضه جنسها ورافضه شخصيتها ورافضه حياتها كلها حمده باختصار : مو مثل كل البنات !!!!! اغلب التغيرات الى تمر فيها اى بنت حمده ماتعرفها اكتشفت انى جالسه مع بنت غريبه بنت كان وراء سكوتها عالم غريب ... يتبع
|
|
|
|
| 2 أعضاء قالوا شكراً لـ &ورد الجوري& على المشاركة المفيدة: |
|
12-05-2011, 06:00 PM
|
رقم المشاركة : 6 |
|
شكراً: 70
تم شكره 233 مرة في 78 مشاركة
|
رد: روايه تصدقون زميلتي طلعت ولد..
[COLOR="rgb(160, 82, 45)"]..
بعد كلام طويل سكتت حمده ... وانا من هول الموقف سكت ولقيتها تبكى ... وتبكى ,,, وتبكى ودمعت عيونى معها ... ورحمت حالها بعد سكوت طويل : سليله : حمده حمده : نعم سليله : المفروض انتى ماتسكتين عل نفسك حمده: شلون ما اسكت سليله: روحى طبيب يشوفك يمكن انك عندك مشكله حمده: ودتنى امى للطبيب وقال: ماعنده مشكله صحيه يمكن عامل نفسي قولى لى ياسليله وش اسوى ؟؟؟ سليله : سليله محتاره اكثر منك بس أكيد فيه حل ياحمده انتى ميته وانتى حيه حرام الى يصير معك واهلك شلون ماحاول احد منهم يساعدك حمده:: رجعت تبكى من جديد وجت عندنا طالبتين من المصلى وش فيها تبكى ؟؟ سليله : لا ابد مافيها شي تعبانه شوى لو سمحتوا ابعدوا من هنا .. حمده : تحملت واجد سليله مو قادره اتحمل اهلى مو مهتمين حتى البنات هنا يتمسخرون عل وعلى شكلى حتى انتى ياسليله بعد ماصرتى تتكلمى معى صاروا يقولون جت سليله الى خلت حمده تنطق.. تعبت ياسليله من حياتى زهقت من نفسي ما احس الثوب ثوبى .. ولا المكان مكانى تعبت سليله: قولى لا اله الا الله ياحمده حمده : علمينى وش اسوى انتى طلبتى منى اتكلم واليوم انا تكلمت وقلت شي ادرى صعب ويمكن مو مصدقه بس هذا الواقع علمينى ياسليله وش اسوى ؟ سليله : انا اوعدك بساعدك ياحمده حمده : شلون ياسليله ؟ سليله: مدرى واالله بس اكيد فيه حل ممكن اكلم امك نكلم اختك فضه نكلم الدكتوره الى هنا بالكليه نشوف وش تقول بحالتك لاتخافين ياحمده قولى يارب حمده : يارب يارب ياسليله ومدت حمده يدها لى بصراحه خفت ما ادرى ليه حسيت بخوف وكان ثوانى مرت على ويد حمده ممدوده من اصعب الثوانى كنت بحيره امد لها يدى وانا خايفه منها من عالمها المجهول او اترك يدها ممدوده وهنا اكسر نفسها وهى مو ناقصه خاصه بعد ماوثقت فينى هنا وبسرعه اخذت مصحف من المصاحف الى بالمصلى وحطيته بيد حمده وقلت لها : قومى ياحمده وصلى ركعتين واقرى شوى بالقران اكيد نفسك بتهدى ... وانتهى اليوم ورجعت البيت والحافظه حقت الخبز معى فاضيه البنات ماقصروا جلست افكر بحمده وحالها ودخلت النت ابحث عن حاله مثل حالتها ولقيت فيه ناس كذا وقررت الصبح اروح عند دكتوره الكليه واعرض الامر عليها واشوف وش تفسير الحاله؟ الساعه سبعه الصبح كنت بالكليه دخلت القاعه ولقيت تغريد وفاتن كل وحده جالسه بمكان وتكلم بالجوال جلست افكر بحال حمده قمت من مكانى وجلست عل كرسي حمده المعتاد قلت يمكن اوصل لحل اذا جلست مكانها قعدت اتامل حال فاتن وتغريد وهم يتكلمون يضحكون سوى واذا حكت وحده سكتت الثانيه سليله : هيه فاتن فاتن : نعم سليله سليله : من تكلمين ؟ فاتن : وش القافه وش عليك ؟ سليله : اسفه ما اقصد بس فيه شي زدى اعرفه فاتن : وشو سليله : انتى تكلمين تغريد فاتن : ايه وطلعت فاتن وتغريد يكلمون بعض بالجوال وهم بغرفه وحده !! الله لا يسفهنا !!! جت الساعه ثمان وجو اغلب البنات فجاءه طلع لنا الدكتور على الشاشه واعتذر عن المحاضره اشوى فكه اصلا انا مو مركزه اليوم .. ولقيتها فرصه اروح العياده الطبيه بالكليه واشوف الدكتوره وش تقول اخذت شنطه يدى ونزلت بسرعه. كان الصبح بدرى والعياده شبه فاضيه دخلت ولقيت باب الكتوره مفتوحه وجيت ابدخل ولما وصلت عند عتبه الباب سمعت : الدكتوره : وضعك متاخر خلاص ما اقدر اسوى لك شي الطالبه : تبكى ارجووك يادكتوره والله لو يدرون اهلى ذبحونى الدكتوره : لاحول ولاقوه الابالله يابنتى لازم يعرفون الطالبه : وش يعرفون ما اقدر اقولهم كان عندى امل يجى ونتزوج بس وش اسوى الحين الدكتوره : انتى الحين بشهر الثالث ولازم وضعك يكون رسمى وقانوى واهلك لازوم يعرفون يابنتى !!!!! طلعت من العياده بسرعه وقلبى يدق من الخووف اعوذبالله وش المصايب .. جلست على الكراسى الى برى العياده مزنه : سليله سليله سليله: هلا مزنه مزنه : وش تسوين هنا سليله : ابد ماعندنا محاضره اعتذر الدكتور جيت اخذ لى حبه بنادول من الدكتوره راسي مصدع مزنه : ماتشوفين شر سليله : مايجيك وانتى ليه هنا مزنه : ابدا جايبه اجازه مرضيه اسبوعين ماتخرش الميه ميه الميه ابوى جابها لى من واحد صديقه راعى مستوصف خاص : وليه الشهاده المزوره ؟ مزنه : ابد مليت من الكليه بروح عندنا هناك بالديره فيه كم عرس يحبهم قلبك بحضر ووسع صدرى واجى .. وهنا طلعت البنت الى كانت عند الطبيبه ودخلت مزنه ووقعت الاجازه بكل سهوله .. ودخلت انا عند الدكتوره : صباح الخير الدكتوره : هلا اسمك وعمرك وش تشتكين منه ؟ : لا يادكتوره مو انا صديقتى الدكتوره : نزلت القلم من يدها صديقتك ووينها ماتجى نكشف عليها هنا : لو سمحتى دكتوره انا ابقولك موضوع مهم دكتوره : تفضلى وشرحت لللدكتوره وضع حمده زى مافهمت منها الدكتوره : طيب ممكن تجى صديقتك هنا اشوفها : ممكن لحظه بس وطلعت ركض على الدرج ووصلت القاعه يتبع [/COLOR]
|
|
|
|
| الأعضاء الذين قالوا شكراً لـ &ورد الجوري& على المشاركة المفيدة: |
|
12-05-2011, 06:01 PM
|
رقم المشاركة : 7 |
|
شكراً: 70
تم شكره 233 مرة في 78 مشاركة
|
رد: روايه تصدقون زميلتي طلعت ولد..
ولقيت البنات يتكلمون عن مشاعل وكلبها دودى
وشفت حمده من بعيد واشرت لها بيدى تعالى وخلال دقائق كانت حمده عند الدكتوره الدكتوره اسمك وعمرك حمده : اسمى حمده ال ..... وعمرى 22 سنه الدكتوره: طيب ياسليله ممكن تطلعين برى عشان اكشف على صديقتك وطلعت وجلست برى وطولت حمده عند الدكتوره يمكن اكثر من نص ساعه بعد مده انفتح الباب وطلعت حمده ودخلت على الدكتوره سليله : خير دكتوره دكتوره : خير ياسليله سليله : وش طلع معك الدكتوره : والله هذا اسرار مريض المفروض ماقولها لك بس انا شايفه انك مهتمه بزميلتك وهذا شي حلو شوفى ياسليله حمده حاله فيه منها كثير سليله : كيف يعنى مافهمت ؟ الدكتوره : انا سالتها اسئله وكشفت عليها هنا بس الكشف مايكفى وطلبت منها تعمل اشعه على الرحم عشان نتاكد سليله : تتاكدين من إيش دكتوره ؟ الدكتوره : نتاكد فيه رحم عندها او لا ؟؟؟؟ سليله : يعنى إيش ؟ الدكتوره : يعنى صديقتك ياسليله 60% ولد ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟-------------------------------------------------------------------------------- طلعت من عند الدكتور كانى طالعه من فلم سينمائى اجل حمده ولد معقووله طلعت برى العياده الطبييه ولقيت حمده واقفه تنتظرنى حمده : سليله تاخرتى وش قالت لك الدكتوره ؟ سليله : مثل ماسمعتى تبى منك اشعه حمده : ايه عطتنى تحويل للمستشفى بس مادرى اهلى بيرضون اروح ؟ سليله : لازم تروحين مشيت مع حمده لحد ماوصلنا الساحه الكبيره جلست على اقرب كرسي ما قدرت اكمل حمده : سليله وش فيك رفعت راسي وطالعت بحمده تاملت ملامح وجهها تاملت عيونها حواجبها كثيفه ونظرات عيونها حاده و يمه معقوله تكون ولد من جد !!! جمعت اخر قوه عندى ونطقت سليله: حمده حمده : خير سليله : انت لازم تسوين الاشعه وتعرفين راسك من رجولك مو معقول تظلين كذا و و و و و حمده : و وشو كملى ياسليله وش بتقولين ومتردده سليله : لا اقصد ايه يعنى لو .... حمده : لو ايش؟ سليله : لو طلعتى ولد ياحمده وشلون ما اعرف اقولك انا انتى البنات و حمده : فاهمه وش تقصدين ياسليله والله فاهمه انتى خايفه اطلع ولد زى ما قالت الدكتوره وانا اعرفكم واعرف عنكم كل شي صدقينى ياسليله بيظل كل عالمى مع البنات ذكرى بحاول انسى اني عشتها بس ما اظن اقدر ابوى واهلى بيرفضون الكلام وبيعتبرونه جنون ووقفت وطلبت من حمده نروح القاعه ومشينا كنت احس انى مو عارفه امشى ووصلنا المصعد الكهربائى وكان فاضى حمده : يالله سليله ادخلى سليله : هاه حمده : وش فيك اطلعى خلينا نروح القاعه تبون الجد خفت اركب المصعد معها اجل اركب مع ولد ياويل حالى طلعت الدرج وانا براسي الف فكره وتفكير ومشيت بالممر وفجاءه لقيت حمده ماسكه يدى وتقول : حمده : سليله ارجوك الموضوع بيظل سر بيننا سليله : اكيد لا تخافين ودخلنا القاعه نوير: انتم وينكم سليله : كنا نتمشى تحت ورجعت حمده مكانها هناك باخر القاعه الكرسي الصامت وجلست وسكتت ورجعت لحاله السكوت قعدت اطالع حمده من بعيد ياترى لو ساكته افضل احيانا ركود الماء يكون شكله صافى بس نحركه يصير ماء عكر ياترى انا صح بالى سويته مع حمده ظليت ورها لحد ماتكلمت وحركت الماء نوير : سليله ,,, سليله سليله : هلا نوير نوير: وش عندك بالله انتى وحمده لكم فتره ما ادرى وش فيكم! وش اقول لنوير اقول حمده طلعت ولد حسيت انى غشاشه اجل عارفه ان فيه ولد معنا بالقاعه وساكته بس يمكن الاحتمال يطلع مو صحيح وتكون حمده بنت بس عندها مشكله صحيه وبعدين انا وعدت حمده ما اقول لحد عن سرها نوير : لا لا انا شكلى اتكلم مع نفسي سليله : لا اسمعك يانوير بس راسي مصدع شوى نوير : سلامتك . سليله : الله يسلمك هنا لقيت رقيه طابه علينا وقالت : رقيه : منو اللى راسها مصدع ,, سمعت وحده منكم تقول راسها مصدع سليله : انا وسحبت رقيه كرسي وجلست معنا رقيه : ماتشوفين شر ياسليله سليله : مايجيك .. رقيه : انا معى حبوب وجع راس تخلى راسك ميه الميه!!! هنا لقيت نوير تضربنى برجلها من تحت الطاولات عرفت ان نوير تبى تنبهنى لشي حطيت عيونى بعيون نوير وفهمت المطلوب رقيه : خوذى ياسليله هذه حبه بتخليك تمام سليله : مشكوره رقيه بس تونى اخذت بنادول رقيه : اى بنادول واى خرابيط هذه حبه غير وضربتنى نوير المره ضربه قويه مع رجلى من تحت الطاوله اخذت الحبه من رقيه وشكرتها وطلعت برى القاعه وطلعت نويرمعى سليله : دامك تعرفين انها مو صاحيه وتعطى البنات من الحبوب ليه نظل ساكتين نوير: وش نقول سليله : نعلم عليها الى متى ورقيه توزع حبوب الله العالم فيها على البنات يانوير انا وانتى نعرف حقيقه الحبوب بس غيرنا لا نوير : الله ياخذها الرقيه اخذت الحبه وحطيتها بجيبى نوير : سليله انتى مجنونه رسمى وش تبين بالحبه تحطينها بجيبك !! سليله : بعطيها دكتور يشوف وش نوعها وقررت اعطى الحبه احد يشوف وش نوعها قلت اعطيها اخوى لا لا مايصلح وش بيقول من وين جبتها احسن شي اعطيها دكتوره تشوف !! بس انا ما احب اروح عند الدكتوره بعد ماكنت عندها مع حمده نوير: سليله سليله : نعم نوير: ماقلتى لى وش عندك مع حمده سليله : ولاشي كنا نتمشى تحت وبس نوير: وتكلمت معك سليله : ايه نوير : ايه بس سليله : بس وشو ؟ نوير : لا لا خلاص سليله : قولى يانوير فيه عندك كلام اعرفك نوير: بصراحه ايه سليله : قولى نوير : سليله انتى صديقتى من زمان ودرسنا مع بعض من ايام الابتدائى ولك على حق وو سليله : ايه كملى نوير : بصر احه البنات يتكلمون عليك انتى وحمده سليله : يتكلمون وش يقولون ؟ نوير : يقولون .... سليله : ايه وش يقولون ؟ نوير : يقولون حمده تحب سليله وعشان كذا نطقت وصرت تتكلم وماتضحك غير معك وماتتكلم غير معك وبينكم نظرات وحكى وروحات وجيات بالساحه و سليله : ايه كملى نوير : زعلتى ياسليله سليله: اذا بكون زعلانه مو منهم يانوير انتى صديقتى وعارفه منهو انا انا ماسويت شي غلط انا نيتى وهدفى اكبر من كلام ماله سنع وبعدين حمده تحبنى وش فيها المحبه من الله تكلمت معى شي طيب انا سويت شي لى اجر وثواب عليه ليه تفكيركم سئ قعدت اتكلم مع نوير وبراسي تدور اشياء واشياء اجل لو يدرون البنات ان حمده ولد وش بيقولون فكرت لحظات بحال ابوى واخوانى لو جاهم خبر انى صديقتى ولد هزيت راسي وابعدت الفكره ........ وانتهى اليوم ورجعت البيت تعبانه من جد دخلت غرفتى وغيرت ملابسى ورميتهم على الارض ونمت قمت بعد ساعات ولقيت نوير متصله على اكثر من مره دخلت المطبخ وسويت قهوه لنفسي لقيت الشغاله جايه عندى: جاتى: سليله ماما سليله سليله : خير جاتى فيك شي؟ جاتى : لا ماما سليله بس انا فيه غسيل ملابس انتى سليله : مشكوره جاتى جاتى : بعدين انا فيه غسيل ملابس فيه يسوف حبه سليله : اى حبه جاتى : هذه حبه وطلعت جاتى الحبه الى اخذتها من رقيه جاتى : بصوت يسمعه الميت مامار هذه هبه مافيه كويس بعدين انى ياكل هبه فيه جن جان سليله : اسكتى قصرى صوتك فضحتينا جن جان ببطن العدو ومسكت جاتى علىى جمب وسالتها عن الحبوب وعرفت انها من الحبوب المسهره المخدره وقررت ما افوت الرقيه وتصرفها على خير .. شربت فنجال القهوه ودقيت على نوير نوير : هلاسليله وينك سليله : كنت نايمه نوير: كل هذا نوم خيشه نوم سليله: اليوم مصدعه حطيت راسي ماحسيت بالوقت نوير : سليله لاتكونين زعلانه منى سليله : لا يانوير ماينزعل منك نوير: اشوفك بكره سليله : اذا الله راد ............ وجاء يوم جديد وماجت حمده للكليه غياب ومر يوم ثانى غياب اسبوع غياب قررت اسئل فضه اختها عنها وسالت : سليله : فضه ليه حمده غايبه اسبوع فضه: ماظن انها بترجع سليله : ليه ؟ فضه: مادرى تقول خلاص ماتبى تكمل دراسه وبعدين عرسها قرب قال ابوى لاتكملين البنت مالها بالنهايه الابيت زوجها سليله : اى عرس !!! انتى وش تقولين فضه : عرس حمده سليله : ايه بس ماقالت لى انها بتعرس فضه : معليش ياسليله الموضوع فجاءه لا مو فجاءه ولد عمى من زمان يبىحمده والحين خلاص الاهل كلهم موافقين رجعت من عند فضه مو مصدقه حمده بتتزوج ؟؟ معقوله شلون وليه التوقيت هذا بالذات وش معنى الحين صار موضوع الزواج وصلت القاعه ............... يتبع
|
|
|
|
| الأعضاء الذين قالوا شكراً لـ &ورد الجوري& على المشاركة المفيدة: |
|
12-05-2011, 06:02 PM
|
رقم المشاركة : 8 |
|
شكراً: 70
تم شكره 233 مرة في 78 مشاركة
|
رد: روايه تصدقون زميلتي طلعت ولد..
وجاء يوم جديد
وماجت حمده للكليه غياب ومر يوم ثانى غياب اسبوع غياب قررت اسئل فضه اختها عنها وسالت : سليله : فضه ليه حمده غايبه اسبوع فضه: ماظن انها بترجع سليله : ليه ؟ فضه: مادرى تقول خلاص ماتبى تكمل دراسه وبعدين عرسها قرب قال ابوى لاتكملين البنت مالها بالنهايه الابيت زوجها سليله : اى عرس !!! انتى وش تقولين فضه : عرس حمده سليله : ايه بس ماقالت لى انها بتعرس فضه : معليش ياسليله الموضوع فجاءه لا مو فجاءه ولد عمى من زمان يبىحمده والحين خلاص الاهل كلهم موافقين رجعت من عند فضه مو مصدقه حمده بتتزوج ؟؟ معقوله شلون وليه التوقيت هذا بالذات وش معنى الحين صار موضوع الزواج وصلت القاعه نوير : سليله نزلت درجات الاختبار روحى شوفى درجتك سليله : وعسى درجتى زينه ولمى انتهى اليوم اول ما رجعت للبيت كلمت حمده بالتلفون سليله: الو حمده حمده : هلاسليله سليله : ليه الغياب اليوم اخذت رقمك من فضه قلت اسئل عنك حمده : مشكوره ياسليله سليله : سمعت خبر من فضه انك بتتزوجين ؟؟ حمده : ادرى ياسليله انت مستغربه بس كان الحياه مفروضه علينا ولازم نمشيها لما قلت عند امى الكلام انى لازم اسوى اشعه قامت تهاوش وقالت هذا جنون وهبال وفجاءه لقيت ابوى يقول الى متى والحمده مسببه لنا مشاكل بدل الدكتور رحنا للعشره كلهم يقولون مافيها شي سليمه الحين بعد تبى اشعه وليه احسن حل تتزوج وهذا ولد عمها منا وفينا واخوى ماكلمنى من زمان والحين جاء الوقت المناسب وتحدد العرس بعد شهر سليله ... سليله انتى تسمعينى سليله : اسمعك ياحمده وقفلت التلفون من حمده وانا بحاله ذهول وتزوجت حمده من ولد عمها وكنت اتصل على فضه بالبيت واشوفها بالكليه واسئل عن اخبار حمده وكانت الاجابات تمام مبسوطه ومر شهر واثنين وثلاثه على زواج حمده بس ما قدرت اكلمها بالمده ................. حسيت انى كنت بحلم او كابوس وتنفست وقلت اشوى طلعت بنت وطلع كل الكلام اوهام ؟؟ ومرت الايام والشهور وكانت اجازه الصيف بدت وقفلت الكليه ابوبها وفى يوم دق تلفون البيت ... جدتى : هلا ايه موجوده ياسليله ’’ تعالى واخذت السماعه من جدتى سليله: الو الو حمده : الو سليله سليله : حمده هلا شلونك لى اربعه شهور ماسمعت صوتك كذا الى يتزوجون ماعاد نسمع اخبارهم حمده : سليله اانا تطلقت وفضه اختى تبى تكلمك فضه: هلاسليله سليله : للحين مصدومه من كلام حمده هلافضه فضه: سليله ممكن اشوفك سليله : ممكن بس وين الكليه وخلصنا فضه: على راحتك تحبين اجى عندك البيت او اشوفك بملاهى او اى مكان عام سليله : خلاص حياك الله تعالى البيت وهاتى حمده معك فضه : اذا جيت عندك بتفهمين !! واعطيت فضه موعد وعنوان البيت وقعدت انتظر ليه فضه بتجى عندنا ؟؟ وليه مو حمده الى تجى ؟؟؟؟ يتبع
|
|
|
|
| الأعضاء الذين قالوا شكراً لـ &ورد الجوري& على المشاركة المفيدة: |
|
12-05-2011, 06:03 PM
|
رقم المشاركة : 9 |
|
شكراً: 70
تم شكره 233 مرة في 78 مشاركة
|
رد: روايه تصدقون زميلتي طلعت ولد..
وبعد المغرب
وصلت فضه لبيتنا جدتى : ياهلا ويامسهلا بالى جانا فضه : هلابك جدتى جدتى : انت خويه سليله بالمدرسه فضه : ههههههههه مو مدرسه ياجدتى كليه ودخلت ولقيت فضه سوالف وعلوم مع جدتى وجلست مع فضه وماكان معها احد وسالت: سليله : وين حمده ماجت معك ؟ وش الكلام الى تقوله انها تطلقت ؟؟ فضه : سليله لو سمحتى ممكن اتكلم معك كلام مهم سليله : تفضلى يافضه خير ؟ فضه : والله مو عارفه كيف ابدا الموضوع بس سليله : تكلمى فضه وش صاير فضه : سكوووووووووت سليله : ياربى من العايله تعبت من كثر السكوت عندكم تكلمى يافضه فضه : سليله حمده تزوجت ولد عمى بسرعه خلال شهر لان امى تهاوشت مع ابوى لان حمده صارت تقول كلام مو مفهوم وانها لازم تتاكد من جنسها وانك انتى تكلمتى مع دكتوره الكليه بموضوعها وانها لازم تسوى اشعه ابوى لما سمع الكلام طلب من عمى بسرعه ولده يتزوج حمده وفعلا تزوجت حمده من ولد عمى وكلنا فرحنا وتخيلنا ان الموضوع انتهى وان حمده كانت عايشه باوهام ومر شهر واثنين على زواج حمده وكل يوم يمر كانت امى تشكر ربها فيه لان حمده من يوم هى صغيره كانت مسببه مشاكل ومتاعب للوالده وبعد مرور ثلاث شهور على زواج حمده تطلقت .. سليله : والسبب؟؟ فضه : اكتشف زوجها انها مو بنت؟؟ سليله : شلون يعنى ؟؟؟؟ فضه : لا لا لاتفهمين غلط ياسليله اقصد ماطلعت بنت طلعت ولد وعرضها بنفسه على دكتور وسوى لها اشعه واكدت كل التقارير الطبيه انها ولد وانها مولوده بعيب خلقى ولما كانت صغيره اشتبه االامر على امى وظنت انها بنت وعاشت حمده 22 سنه من حياتها نتيجه تشخيص غلط وتحديد نوع غلط وتعرفين ايام زمان ماكانت الامهات تولد بالمستشفيات وامى ماعرفت تحدد نوعها وظلت حمده ولد محشور بجسم بنت طول السنين حنا اهلها كنا نشوفها دائم لوحدها بس مافكرنا للحظه انها ممكن تكون ولد لحد ماتزوجت وعرف زوجها واليوم ياسليله جايه اقولك : يتبع
|
|
|
|
| 2 أعضاء قالوا شكراً لـ &ورد الجوري& على المشاركة المفيدة: |
|
12-05-2011, 06:05 PM
|
رقم المشاركة : 10 |
|
شكراً: 70
تم شكره 233 مرة في 78 مشاركة
|
رد: روايه تصدقون زميلتي طلعت ولد..
ان حمده صارت حمد ؟؟؟؟
سليله : حمد !!! فضه: ايه حمد وطلعت شهاده رسميه انها ولد ..... وحطيت يدى على راسي مو مصدقه الى اسمعه حمده صارت حمد؟؟؟ يتبع ..... وحطيت يدى على راسي مو مصدقه كلام فضه كانى بحلم مر على شريط حمده كله حمده الى كانت معنا ولد !!!!! للحين حاطه يدى على راسي فضه : سليله ’’ سليله سليله .. هلا فضه فضه .. معك حقك ياسليله الى صار مع اختى عجيب سليله : شلون صار كل هذا .؟ فضه : حمده ياسليله من ولدتها امى وهى سبب تعب لها .. تخيلى ,, بيوم ولادتها مات جدى وصار حادث على خالى و سليله : يابنت الحلال هذا كله مكتوب من الله.. فضه : ادرى ياسليله بس اهلى وتفكيرهم امى ولدت حمده بالبيت تعرفين من عشرين سنه اغلب الحريم يجبون عيالهم بالبيوت والجهل ماخلى امى تعرض حمده على طبيب لما شكت بنوعها او اشتبه عليها الموضوع حتى ابوى تعب من كثر ما هى تشكى له حال حمده الصحى ومن كثر ما دار بحمده على دكاتره يشوفونها وماصدق انى عمى تكلم معه وزوجها ولده وتزوجت بسرعه سليله: بس انتم ظلمتو حمده واجد يافضه حرام الى صار معها ... فضه : يمكن معك حق ياسليله ,, بس حنا اهل لنا الظاهر وابوى تفكيره العرس والزواج حل لكل مشاكلها ومالومك بحاله الذهول الى انتى فيها ياسليله ما انسى ذاك اليوم لما رجعت حمده مع زوجها بعد ماسافرو لجده بعد زواجهم رجع زوجها بعد اسبوع عندنا بالبيت والله ياسليله ما انسى كلامه لما قال لبوى بنتك رجال ياعمى ابوى ياحليله يحسبها مدحه لبنته بس امى فهمت وقال زوجها قدام الجميع ان حمده رجال مو بنت وانه كان معها بالعشره ايام بجده مع رجل مثله مايفرق عنه بشي ابوى كان بحاله صدمه مثل صدمتك الحين وازود الكل كان مابين ضاحك وباكى ومصدق ومكذب ووقف زوج حمده وقال : انا عرضتها على اكبر دكتور وسوى لها كل اللزوم وأثبت انها ولد كامل الذكوره ... والحين ياعمى هذه بنتك حمده او ولدك حمد عندك وبالنسبه للطلاق والله ما ادرى كيف اطلق لازم نسال شيخ فيها شلون اطلق رجال مثلى!!! سليله: وحمده ,, وحمده وسط كل هذا كيف كان حالها ؟؟ فضه: تصدقين حمده كانت أكثر وحده هادئه كنها عرفت نفسها اخير من تكون كنت أشوف بوجها رضى وراحه صحيح البيت كله تلخبط بعد السالفه وتعرفين الناس طلع منهم حكى وسوالف الى يقول : البنت ماهى صاحيه وراها مصيبه واهلها اخترعو سالفه انها ولد عشان يسترون عليها !! ناس ما تخاف الله .... ابوى واخوانى اتخذو كل الازم وسوى اوراق ثبوتيه وطبيه وصارت حمده بعد 22 سنه حمد بيوم وليله صراحه حالنا ياسليله كان صعب حيل حتى لما جت حمده تطلع مع ابوى للشارع ماقدرت تطلع بدون عبايه واخوانى يقولون شلون يشفونها الناس وتصدقين بيتنا امتلى من الناس من ربعنا كلهم جو يشفون حمد عقب ماكان حمده؟؟ سليله : وكيف نفسيتها الحين فضه : الحمدالله بس سليله : بس إيش يافضه فضه: بس حمده اقصد حمد محملنى رساله لك ياسليله سليله : رساله لى انا ؟ يتبع
|
|
|
|
| 3 أعضاء قالوا شكراً لـ &ورد الجوري& على المشاركة المفيدة: |
|
| مواقع النشر (المفضلة) |
«
الموضوع السابق
|
الموضوع التالي
»
العرض المتطور
|
|
الساعة الآن 10:37 PM
