طفولـــــة مرقعـــــة بالخيــــزران والسبب الفنانة احــــلام !!!!!!

[Anvas-ALwrd]

 

مالكم في الطويلة نخش في الموضوع قصتي مع الاندرتيكر أحلام وكيف تعرفت عليها في صباي واخذت هدية منها بطريقة غير مباشرة والسبب دلاختي يوم كنت معجب فيها

هذا الله يسلمكم يوم كنت في اول متوسط كنت اجمع مصروف المدرسة وأكابر على جوعي لهدف اسمى وهو اني اشتري شريط احلام الجديد وكان وقتها قيمته 15 ريال ترى الفكرة مو في الشريط الفكرة في الصورة المكبرة لإحلام داخل الالبوم هي اللي شدتني !!!!!!

المهم رحت من بيتنا لمحل تسجيلات الاغاني مشي على الرجلين وكانت المسافة تقارب الكيلو والنصف كله عشان صورة احلام الله واكبر لو ادري انها بتصير كذا في زمن الالفية الثانية ماكان تعبت رجولي متر واحد لعيونها !!!!!

أول ماناولني صاحب المحل الشريط على طول مثل الملهوف قمت اقطع النايلون وآخذ صورة احلام واحطها في محفظتي الشفافة عشان اتكشخ فيها ورميت الشريط في وجه راعي المحل وقلتله اسمعها لحالك !!!! وكان هذا الكلام بعد صلاة العشاء وبعدها رجعت البيت عشان انام وودي يطلع الصبح بسرعة عشان اوريها العيال ، وفعلا جاء الصبح وطيران على المدرسة وللاسف ماكان في المدرسة الا انا جاي بعد صلاة الفجر مباشرة حتى من قبل لاتشرق الشمس ، المهم قاعد اتمقل في الصورة لين جو العيال وودي بس واحد منهم يقولي عندك سلف او ورني بطاقة احوالك عشان انزل المحفظة الشفافة ويشوفون صورة احلام ويقولولي وريني اياها وآخذ من كل واحد ريال عشان تقعد الصورة معاه دقيقة وحدة فقط ، آه ياذيك الايام كان مخي تجاري بحت يازينك من مخ قبل لاتصدي !!!!!

وتمر الايام وفجأة يدخل مدير المدرسة علينا في الفصل وينادي بإسمي وانا اول شيء جاء في بالي انه المدير عرف انه معاي صورة احلام الحصرية ويبغى يشوفها بس مستحي يوقف طابور حاله مثل حال باقي الطلاب عشان كذا اخترع سالفة دخوله للفصل ويقولي ابغاك في كلمة راس !!!!

أنا : خير ياأستاذ عسى ماشر لايكون مكسوف مني عشان ذاك الشيء !!!!

المدير: وفي نص جبهته علامة تعجب وفي طرفها الايمن والايسر علامات استفهام ويقول وش قاعد تتكلم عنه انا جيتك عشان ابوك يبغاك عندي في المكتب !!!!!

طبعا يوم قال ابوي في المدرسة قلت بس فيه مصيبة جايتني في الطريق والحمد لله اننا منا في الفسحة عشان مايفشلني قدام اصحابي !!!!

أبوي : هذا انت يالهيس الاربد ، وش قصة صورة الاماراتية اللي معاك ، اللي اعطيتها اخوك وانكفش في المدرسة !!!!

أنا : أي صورة تتكلم عنها وعلى طول لا إراديا قمت افتش المحفظة ومافيه اي اثر لصورة أحلام وكأنه عقارب الساعة توقفت عن الحياة ولسان حالي يقول ( ابوي اكيد انك قاعد تسوي فيني الكاميرا الخفية وتقولي في النهاية مقلبتك مثل مايقولها ناصر القصبي لعبدالله السدحان )

على طول اخذت ابوي وجري على مدرسة اخوي الابتدائية قبل المدير لايسوي شيء في الصورة يقطعها او يحرقها خصوصا انه ملتحي !!!!!

اول مادخلت مكتب المدير الا هو يرحب فينا وجنبه اخوي الصغير والابتسامة تشق شفايفه شق ، وانا عاض لساني وجبهتي كلها مطبات من التعصيب واقول في نفسي هين هين ياوليد !!!!

المدير: انت سالم اخو وليد

أنا : ايه ياحضرة المدير عسى ماخلاف

المدير : انت صاحب هالصورة اللي فيها صورة بنت !!!!!

أنا : من زود حماستي ايه انا صاحبها بس لاتفكر انها صديقتي او بنت الجيران ويروح فكرك لبعيد تراها فنانة وشيء طبيعي تشوف صورها في كل محفظة وفي كل بيت !!!! سؤال يامدير وش جاب الصورة عندك ؟؟؟؟ //// هههههههههههاي سؤال مدري وش يبغى بس سالته اياه عشان يعطف علي ومايسوي شيء باحلام !!!

المدير: اسال اخوك وهو يعلمك بالقصة !!!!

أنا : وليد كيف اخذت الصورة ومين أذنلك اصلا تاخذها ؟؟؟

وليد: شفتها معاك ذاك اليوم وقلت بشخص فيها قدام اصحابي عشان يسوولي هيبة واذا تاخرت يسالون عني مو عشاني انا عشان يشوفون صورة احلام وبكذا اصير مهم عندهم !!!!! وبعدها جاء التفتيش الفجائي وصار اللي صار !!!!!

أنا : يالمدير يالمدير وش بيكون مصير صورة احلام ، وانا كأني اشوف خيال أحلام قدامي وهي تدندن ( تدري ليش ازعل عليك تداول صورتي بين هذا وذاك ) !!!!!

المدير: اكيد بحرقها مايجوز تحتفظ بصور بشر ، ماتدري انه الملائكة ماتدخل بيوت من بداخلها صور كائنات حية !!!!

انا : يالمدير عطني انا بحرقها يرحم امك دفعت مصروف اسبوعين كاملين عشان اجمع قيمتها واشتريها !!!!

المدير : ينادي الحارس ويوصيه على الولاعة ويجيب الحارس الولاعة وولع في صورتها ، كأنه ولع في قلبي تريلة كاملة من الديزل وانا ابكي من القهر !!!!

طبعا كالعادة قرصت اخوي بقوة قدام ابوي والمدير ، وابوي اخذنا من المدرسة وبالخيزرانة في الشارع قدام الناس لدرجة انه ظهري صار مثل الكاتشب من الحمار ، ورجعنا البيت وكمل ابوي الناقص وغير سياسته من خيزرانة الى انبوب الغاز السميك هذا اللي بجد خلاني انسى شيء اسمه احلام واللي خلفوا احلام !!!! وبعدها بيومين أقلب في قنوات الدش الفضائية الا اشوف أحلام ويالا المصادفة أسمع منها جملة ( علقة تفوت ولاحد يموت ) مدري بس حسيت انها تقصدني خصوصا يوم تقولها كانت فاطسة من الضحك

ماني مصدق كيف كنت اهبل وانا صغير اضيع فلوسي على صور احلام وانضرب عشانها وهي مافكرت فيني ، واليوم انا مااحب اشوفها ولا اسمع صوتها ، شتان بين النقيضان !!!!!!


،

نقلتهاا من احد المنتديات
فطستني ضحك عليها

-:مواضيع أخرى تفيدك:-

• قصة رجل حج أكثر من 30 مرة والسبب !!
• اكتبي ححآلة مزاجك الآن والسبب !
• امرأة تصاب با الايدز والسبب احمر شفاااه
• أنشودة :خلاص ابرحل والسبب كثرالأحزان (حمـلـہ متمــيـز أنـــــــآ)